ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଇଟାଲୀର ପ୍ରଧାନମନ୍ତ୍ରୀ ଜର୍ଜିଆ ମେଲୋନିଙ୍କ ମଧ୍ୟରେ ବାକଯୁଦ୍ଧ ଆରମ୍ଭ ହୋଇଛି। ଜି-୭ (G7) ସମ୍ମିଳନୀରେ ମେଲୋନି ଏକ ଫଟୋ ଉଠାଇବା ପାଇଁ ତାଙ୍କୁ ଅନୁରୋଧ କରିଥିଲେ ବୋଲି ଟ୍ରମ୍ପ ଦାବି କରିବା ପରେ, ମେଲୋନି ଏହାର କଡ଼ା ଜବାବ ଦେଇଛନ୍ତି । ଟ୍ରମ୍ପଙ୍କ ଏହି ଦାବିକୁ ସମ୍ପୂର୍ଣ୍ଣ ମିଥ୍ୟା ଓ ଭିତ୍ତିହୀନ ବୋଲି କହିବା ସହ ଇଟାଲୀ ଏବଂ ମୁଁ କେବେ କାହା ଆଗରେ ଭିକ ମାଗୁନାହୁଁ ବୋଲି ମେଲୋନି କହିଛନ୍ତି।
ଇଟାଲୀର ‘La7’ ଟିଭି ଚ୍ୟାନେଲ୍କୁ ଦେଇଥିବା ଏକ ସାକ୍ଷାତକାରରେ ରିପବ୍ଲିକାନ୍ ନେତା ଡୋନାଲ୍ଡ ଟ୍ରମ୍ପ କହିଥିଲେ ଯେ, ମେଲୋନି ତାଙ୍କ ସହ ଏକ ଫଟୋ ଉଠାଇବା ପାଇଁ ଅତ୍ୟନ୍ତ ବ୍ୟାକୁଳ ଥିଲେ। ଟ୍ରମ୍ପ କହିଛନ୍ତି, ‘ମୋ ସହ କଥା ହୋଇ ସେ (ମେଲୋନି) ବହୁତ ଖୁସି ଥିବେ। ମୋର ତାଙ୍କ ସହ କଥା ହେବାର କୌଣସି ଆବଶ୍ୟକତା ନଥିଲା। ସେ ମୋ ସହ ଗୋଟିଏ ଫଟୋ ପାଇଁ କାକୁତି ମିନତି ହୋଇଥିଲେ। ମୁଁ ଆଦୌ ଫଟୋ ଉଠାଇ ନଥାନ୍ତି, କିନ୍ତୁ ମୋତେ ତାଙ୍କ ଉପରେ ଦୟା ଆସିଲା, ତେଣୁ ମୁଁ ଫଟୋ ଉଠାଇବାକୁ ରାଜି ହେଲି।’
ମେଲୋନିଙ୍କ ଶାଣିତ ପ୍ରତିଆକ୍ରମଣ
ଟ୍ରମ୍ପଙ୍କ ଏହି ମନ୍ତବ୍ୟ ଉପରେ ଇଟାଲୀର ପ୍ରଧାନମନ୍ତ୍ରୀ ଜର୍ଜିଆ ମେଲୋନି ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ସୋସିଆଲ ମିଡିଆ ପ୍ଲାଟଫର୍ମ X (ପୂର୍ବରୁ ଟ୍ୱିଟର) ରେ ଏକ ପୋଷ୍ଟ କରି ସେ ଲେଖିଛନ୍ତି ଯେ, ନିଜର ବନ୍ଧୁ ରାଷ୍ଟ୍ର ଏବଂ ସହଯୋଗୀମାନଙ୍କୁ ଅପମାନିତ କରିବା ଟ୍ରମ୍ପଙ୍କର ଏକ ପୁରୁଣା ଅଭ୍ୟାସ। ମେଲୋନି କହିଛନ୍ତି ଯେ, ଡୋନାଲ୍ଡ ଟ୍ରମ୍ପଙ୍କ ଏହି ମନ୍ତବ୍ୟ ସମ୍ପୂର୍ଣ୍ଣ ମନଗଢ଼ା ଏବଂ ମିଥ୍ୟା । ଆମେରିକାର ରାଷ୍ଟ୍ରପତି ନିଜର ମିତ୍ର ଦେଶର ନେତାଙ୍କ ସହ ଏଭଳି ବ୍ୟବହାର କାହିଁକି କରୁଛନ୍ତି, ତାହା ବୁଝାପଡ଼ୁନାହିଁ । ଏହା ଅତ୍ୟନ୍ତ ଦୁର୍ଭାଗ୍ୟଜନକ ଯେ, ଟ୍ରମ୍ପ ପାଶ୍ଚାତ୍ୟ ଦେଶ ଏବଂ ଆମେରିକାର ପ୍ରକୃତ ଶତ୍ରୁମାନଙ୍କ ସାମ୍ନାରେ ଯେତିକି ନରମ ଓ ନମନୀୟ ଆଭିମୁଖ୍ୟ ରଖନ୍ତି, ନିଜ ସହଯୋଗୀମାନଙ୍କ ପ୍ରତି ସେତିକି ଆକ୍ରମଣାତ୍ମକ ହୁଅନ୍ତି । ଟ୍ରମ୍ପଙ୍କୁ ଗୋଟିଏ କଥା ଭଲ ଭାବେ ମନେ ରଖିବାକୁ ହେବ ଯେ, ମୁଁ ଏବଂ ମୋ ଦେଶ ଇଟାଲୀ କେବେ କାହା ଆଗରେ ଭିକ ମାଗୁନାହୁଁ।
Io e l’Italia non imploriamo mai. pic.twitter.com/sTpKlqWB67
— Giorgia Meloni (@GiorgiaMeloni) June 19, 2026
କୂଟନୈତିକ ସ୍ତରରେ ପ୍ରତିବାଦ
ଟ୍ରମ୍ପଙ୍କ ଏହି ଆପତ୍ତିଜନକ ବୟାନ କେବଳ ମେଲୋନିଙ୍କୁ ନୁହେଁ, ବରଂ ସମଗ୍ର ଇଟାଲୀ ଦେଶକୁ ଅପମାନିତ କରିଛି ବୋଲି ସେଠାକାର ସରକାର ଅନୁଭବ କରିଛନ୍ତି। ଏହାର ପ୍ରତିବାଦ ସ୍ୱରୂପ ଇଟାଲୀର ବୈଦେଶିକ ମନ୍ତ୍ରୀ ଆଣ୍ଟୋନିଓ ତାଜାନୀ (Antonio Tajani) ନିଜର ଆଗାମୀ ପ୍ରସ୍ତାବିତ ଆମେରିକା ଗସ୍ତକୁ ତୁରନ୍ତ ବାତିଲ୍ କରିଦେଇଛନ୍ତି । ତାଜାନୀ X ରେ ପୋଷ୍ଟ କରି କହିଛନ୍ତି ଯେ, ପ୍ରଧାନମନ୍ତ୍ରୀ ମେଲୋନିଙ୍କ ପ୍ରତି ଟ୍ରମ୍ପ ବ୍ୟବହାର କରିଥିବା ଅଶୋଭନୀୟ ଶବ୍ଦ ସମଗ୍ର ଇଟାଲୀର ସ୍ୱାଭିମାନକୁ ଆଘାତ ପହଞ୍ଚାଇଛି, ତେଣୁ ସେ ଆମେରିକା ଗସ୍ତରେ ଯିବେ ନାହିଁ ।
ଜି-୭ ସମ୍ମିଳନୀ ପରି ଏକ ପ୍ରତିଷ୍ଠିତ ଅନ୍ତର୍ଜାତୀୟ ମଞ୍ଚର ଫଟୋକୁ ନେଇ ଆମେରିକା ଏବଂ ଇଟାଲୀ ଭଳି ଦୁଇ ଶକ୍ତିଶାଳୀ ନାଟୋ (NATO) ସହଯୋଗୀ ଦେଶ ମଧ୍ୟରେ ସୃଷ୍ଟି ହୋଇଥିବା ଏହି ବିବାଦ ବିଶ୍ୱ ରାଜନୀତିକୁ ଚକିତ କରିଛି। ଟ୍ରମ୍ପଙ୍କ ବୟାନବାଜି ଏବଂ ଇଟାଲୀର କଡ଼ା କୂଟନୈତିକ ପ୍ରତିବାଦ ଆଗାମୀ ଦିନରେ ଦୁଇ ଦେଶର ଦ୍ୱିପାକ୍ଷିକ ସମ୍ପର୍କକୁ କେଉଁ ମୋଡ଼ ଦେଉଛି, ତାହା ଉପରେ ସମସ୍ତଙ୍କ ନଜର ରହିବ।
