‘ମୃତ୍ୟୁ ସ୍ୱୀକାର, ନିଜ ଦେଶକୁ ଫେରିବା ନିଶ୍ଚିତ…’, ଡିସେମ୍ୱରରେ ବାଂଲାଦେଶ ଫେରିବା ନିଷ୍ପତ୍ତିରେ ଅଟଳ ଶେଖ ହସିନା

ନୂଆଦିଲ୍ଲୀ: ଡିସେମ୍ବର ମାସରେ ଭାରତରୁ ନିଜ ଦେଶକୁ ଫେରିବେ ବୋଲି ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନା ସ୍ପଷ୍ଟ କରିଛନ୍ତି । ସେ ଜିଦ୍ ଧରି କହିଛନ୍ତି ଯେ ଏହି ନିଷ୍ପତ୍ତି ବଦଳି ନାହିଁ ଏବଂ ସେ ଯେକୌଣସି ପରିସ୍ଥିତିରେ, ଯେକୌଣସି ମୂଲ୍ୟରେ ବାଂଲାଦେଶ ଫେରିବେ । ହସିନା ଦି ଆସୋସିଏଟେଡ୍ ପ୍ରେସ୍ (ଏପି)କୁ ଇମେଲ୍ ଇଣ୍ଟରଭ୍ୟୁରେ ଏହା କହିଛନ୍ତି । ସେ ଲେଖିଛନ୍ତି ଯେ ଯଦି ମୋ ଭାଗ୍ୟରେ ମୃତ୍ୟୁ ଲେଖା ଅଛି, ତେବେ ମୁଁ ମୋ ନିଜ ଲୋକଙ୍କ ମଧ୍ୟରେ ମୋ ନିଜ ମାଟିରେ ମରିବାକୁ ପସନ୍ଦ କରିବି । ତେଣୁ, ମୁଁ ବାଂଲାଦେଶ ଫେରିବି । ମୋର ଏହି ନିଷ୍ପତ୍ତି ବଦଳି ନାହିଁ ।

ଉଲ୍ଲେଖଯୋଗ୍ୟ ଯେ ୨୦୨୫ ମସିହାରେ ବାଂଲାଦେଶର ଏକ ସ୍ୱତନ୍ତ୍ର ଟ୍ରିବ୍ୟୁନାଲ୍ ମୃତ୍ୟୁଦଣ୍ଡ ଘୋଷଣା କରିବା ପରେ ହସିନାଙ୍କ ଏହି ବୟାନ ଆସିଛି । କୋର୍ଟ ତାଙ୍କୁ ମାନବିକତା ବିରୋଧୀ ଅପରାଧ ପାଇଁ ଦୋଷୀ ସାବ୍ୟସ୍ତ କରିଥିଲେ । ୨୦୨୪ ମସିହାରେ ପ୍ରତିବାଦ ସମୟରେ ତାଙ୍କ କାର୍ଯ୍ୟାନୁଷ୍ଠାନ ଏହି ଦଣ୍ଡର ମୁଖ୍ୟ କାରଣ ଥିଲା । କୋର୍ଟଙ୍କ ଅନୁଯାୟୀ, ହସିନା ଏହି କାର୍ଯ୍ୟାନୁଷ୍ଠାନ ନିର୍ଦ୍ଦେଶ ଦେବା ପାଇଁ ଦାୟୀ ଥିଲେ ଏବଂ ଏଥିରେ ଶହ ଶହ ଲୋକ ପ୍ରାଣ ହରାଇଥିଲେ । ହଜାର ହଜାର ଲୋକ ଆହତ ହୋଇଥିଲେ ।

ଜାତିସଂଘର ଏକ ରିପୋର୍ଟରେ କୁହାଯାଇଛି ଯେ ଏହି ସମୟ ମଧ୍ୟରେ ପ୍ରାୟ ୧୪୦୦ ଲୋକଙ୍କ ମୃତ୍ୟୁ ଘଟିଥିଲା । ସେପଟେ ହସିନା କୌଣସି ଭୁଲ କାର୍ଯ୍ୟକୁ ଅସ୍ୱୀକାର କରିଛନ୍ତି । ସେ ଟ୍ରିବ୍ୟୁନାଲର ନିଷ୍ପତ୍ତିକୁ ସମ୍ପୂର୍ଣ୍ଣ ପ୍ରତ୍ୟାଖ୍ୟାନ କରିଛନ୍ତି । ଦାବି କରିଛନ୍ତି ଯେ ଏହା ନିରପେକ୍ଷ ଭାବରେ ପରିଚାଳିତ ହୋଇନାହିଁ ।

ଉଲ୍ଲେଖଯୋଗ୍ୟ ଯେ ୨୦୨୪ ମସିହାରେ ବାଂଲାଦେଶରେ ଛାତ୍ରମାନଙ୍କ ନେତୃତ୍ୱରେ ବିଶାଳ ପ୍ରତିବାଦ ହୋଇଥିଲା । ଏହି ପ୍ରତିବାଦ ଯୋଗୁଁ ଶେଖ୍ ହସିନା କ୍ଷମତାରୁ ବହିଷ୍କୃତ ହୋଇଥିଲେ । କ୍ଷମତା ଛାଡିବା ପରେ, ସେ ଭାରତକୁ ଆସି ଆଶ୍ରୟ ନେଇଛନ୍ତି । ସେ ୨୦୦୯ରୁ ୨୦୨୪ ପର୍ଯ୍ୟନ୍ତ ବାଂଲାଦେଶର ପ୍ରଧାନମନ୍ତ୍ରୀ ଭାବରେ କାର୍ଯ୍ୟ କରିଥିଲେ । ବାଂଲାଦେଶ ସରକାର ଭାରତଠାରୁ ହାସିନାଙ୍କ ପ୍ରତ୍ୟର୍ପଣ ପାଇଁ ବାରମ୍ବାର ଅନୁରୋଧ କରିଆସୁଛି । ତଥାପି, ଭାରତ ତାଙ୍କୁ ବାଂଲାଦେଶକୁ ହସ୍ତାନ୍ତର କରିବାକୁ ମନା କରିଦେଇଛି ।