ଚେନ୍ନାଇ: ତାମିଲନାଡ଼ୁର ଥଲାପତି ବିଜୟ ସରକାର ମହିଳାଙ୍କୁ ଦେଇଛନ୍ତି ଖାସ୍ ଉପହାର। ରାଜ୍ୟରେ ଏବେ ମହିଳା କର୍ମଚାରୀଙ୍କୁ ତୃତୀୟ ସନ୍ତାନ ଜନ୍ମ ଉପରେ ୩୬୫ ଦିନର ଅର୍ଥାତ ବର୍ଷଟିଏ ମାତୃତ୍ଵ ଅବକାଶ ମିଳିବ। ମଙ୍ଗଳବାର ଏହି ଘୋଷଣା କରିଛନ୍ତି ତାମିଲନାଡୁ ସରକାର। ସଂପ୍ରତି ଯେଉଁ ବିବାହିତ ମହିଳ କର୍ମଚାରୀଙ୍କ ୨ରୁ କମ ଜୀବିତ ପିଲା ଅଛନ୍ତି, ସେମାନଙ୍କୁ ୩୬୫ ଦିନର ମାତୃତ୍ଵ ଅବକାଶ ମିଳୁଛି। ଯାହାଙ୍କ ଦୁଇ କିମ୍ବା ତଦୁର୍ଦ୍ଧ୍ଵ ଜୀବିତ ସନ୍ତାନ ଅଛନ୍ତି, ସେମାନଙ୍କୁ ୧୨ ସପ୍ତାହ ପର୍ଯ୍ୟନ୍ତ ମାତୃତ୍ଵ ଅବକାଶ ମିଳୁଛି।
ମାନବ ସମ୍ବଳ ପ୍ରବନ୍ଧନ ମନ୍ତ୍ରୀ ଡି. ସରଥକୁମାର ନିଜ ବିଭାଗ ପାଇଁ ଅନୁଦାନ ଦାବି ଉପରେ ଚର୍ଚ୍ଚା ସମୟରେ ଏହାର ସୂଚନା ଦେଇଛନ୍ତି। ସେ ବିଧାନସଭାରେ କହିଛନ୍ତି ଯେ, ତାମିଲନାଡ଼ୁ ସରକାର ସାମାଜିକ କଲ୍ୟାଣ ଓ ମହିଳା ସଶକ୍ତିକରଣକୁ ପ୍ରାଥମିକତା ଦେଉଥିବା ଏକ କଲ୍ୟାଣକାରୀ ପ୍ରଶାସନ। ଏଥିପାଇଁ ମହିଳା ସରକାରୀ କର୍ମଚାରୀଙ୍କୁ ତୃତୀୟ ସନ୍ତାନ ପାଇଁ ଏବେ ମିଳୁଥିବା ମାତୃତ୍ଵ ଅବକାଶକୁ ୧୨ ସପ୍ତାହ ବୃଦ୍ଧି କରାଯାଇ ୩୬୫ ଦିନ କରାଯାଉଛି।
Also Read: ବ୍ରହ୍ମୋସ ମାଡ଼ରେ ଗୋଟାପଣେ ଥରିଥିଲା ପାକିସ୍ତାନ, ଫୋନ କରି ଯୁଦ୍ଧବିରତି ପାଇଁ କରିଥିଲା ଗୁହାରି
ମାତୃତ୍ଵ ଅବକାଶ ଉପରେ ଗୁରୁତ୍ଵ
ତତ୍କାଳୀନ ରାଜ୍ୟ ସରକାର ମାତୃତ୍ଵ ଅବକାଶର ପ୍ରାରମ୍ଭିକ ୯୦ ଦିନର ଅବଧିକୁ ୨୦୧୧ରେ ବଢାଇ ଛଅ ମାସ, ୨୦୧୬ରେ ୯ ମାସ ଏବଂ ୨୦୨୧ ଜୁଲାଇରେ ଗୋଟିଏ ବର୍ଷ କରିଥିଲେ। ଏହି ମାତୃତ୍ଵ ଅବକାଶର ଲାଭ ସେହି ନିୟମିତ ମହିଳା ରାଜ୍ୟ କର୍ମଚାରୀଙ୍କୁ ମିଳୁଛି, ଯାହାଙ୍କ ଦୁଇରୁ କମ ଜୀବିତ ସନ୍ତାନ ଅଛନ୍ତି।
ସରକାରଙ୍କ ଏହି ବଡ଼ ଘୋଷଣା ସହିତ ଗୃହରେ ଅନ୍ୟ ଏକ ରୋଚକ ଦୃଶ୍ୟ ଦେଖିବାକୁ ମିଳିଥିଲା। ଟିଭିକେ (TVK) ଦଳର ପ୍ରଥମ ଥରର ବିଧାୟିକା ଆର. ପଲ୍ଲବୀ ନିଜର ନବଜାତ ଶିଶୁକୁ ଧରି ବିଧାନସଭା ପରିସରକୁ ଆସିଥିଲେ। ସେ ଶିଶୁଟିକୁ ଗୃହ ବାହାରେ ଜଣେ କେୟାରଟେକର (ଯତ୍ନ ନେଉଥିବା ବ୍ୟକ୍ତି)ଙ୍କ ପାଖରେ ଛାଡ଼ି ବିଧାନସଭା କାର୍ଯ୍ୟକାରିଣୀରେ ଭାଗ ନେଇଥିଲେ।
