ନୂଆଦିଲ୍ଲୀ: ଇରାନ ସହ ବିବାଦ ମଧ୍ୟରେ ଭେନେଜୁଏଲାରେ ସାମାରିକ କାର୍ଯ୍ୟାନୁଷ୍ଠାନ ଜାରି ରଖିଛି ଆମେରିକା । ଭେନେଜୁଏଲାରେ ଚାଲିଥିବା ଏକ ସାମରିକ ଅପରେସନରେ ବିଶ୍ୱର ସବୁଠାରୁ କ୍ରର ତଥା ରକ୍ତମୁଖା ଗ୍ୟାଙ୍ଗ୍ ଲିଡର ‘ନିନୋ ଗୁଇରେରୋ’ (Niño Guerrero) ନିହତ ହୋଇଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏନେଇ ଘୋଷଣା କରିଛନ୍ତି । ଗୁଇରେରୋକୁ ‘”ଦୁନିଆର ସବୁଠାରୁ ରକ୍ତପିପାସୁ ଗ୍ୟାଙ୍ଗ୍ ମୁଖିଆ’ ଭାବେ ବର୍ଣ୍ଣନା କରିଛନ୍ତି ଟ୍ରମ୍ପ ।
କିଏ ଏହି ନିନୋ ଗୁଇରେରୋ ?
ନିନୋ ଗୁଇରେରୋ କେବଳ ଭେନେଜୁଏଲା ନୁହେଁ, ବରଂ ସମଗ୍ର ଲାଟିନ୍ ଆମେରିକାରେ ଆତଙ୍କର ଆଉ ଏକ ନାମ ଥିଲା। ସେ ଅନ୍ତର୍ଜାତୀୟ ଅପରାଧିକ ସଂଗଠନ ‘ଟ୍ରେନ୍ ଡି ଆରାଗୁଆ’ (Tren de Aragua) ର ମୁଖ୍ୟ ଥିଲା। ଏହି ଗ୍ୟାଙ୍ଗ୍ ହତ୍ୟା, ମାନବ ଚାଲାଣ, ମାଦକ ଦ୍ରବ୍ୟ ଚୋରା ଚାଲାଣ ଏବଂ ଅପହରଣ ଭଳି ଜଘନ୍ୟ ଅପରାଧ ପାଇଁ ଜଣାଶୁଣା। ଗତ କିଛି ବର୍ଷ ମଧ୍ୟରେ ଏହି ଗ୍ୟାଙ୍ଗର ନେଟୱର୍କ ଆମେରିକାର ଅନେକ ସହରକୁ ବ୍ୟାପିଥିଲା, ଯାହା ଆମେରିକାର ଆଭ୍ୟନ୍ତରୀଣ ସୁରକ୍ଷା ଓ ଆଇନ ଶୃଙ୍ଖଳା ପ୍ରତି ଏକ ବଡ଼ ବିପଦ ସୃଷ୍ଟି କରିଥିଲା।
କେମିତି ହେଲା ଏହି ଅପରେସନ୍ ?
ରାଷ୍ଟ୍ରପତି ଟ୍ରମ୍ପଙ୍କ ସୂଚନା ଅନୁଯାୟୀ, ଗୁଇରେରୋକୁ ନିପାତ କରିବା ପାଇଁ ଏକ ସୁଚିନ୍ତିତ ଏବଂ ଗୁପ୍ତ ରଣନୀତି ପ୍ରସ୍ତୁତ କରାଯାଇଥିଲା। ଭେନେଜୁଏଲାର ଜଙ୍ଗଲ କିମ୍ବା ତାର ସୁରକ୍ଷିତ ଆସ୍ଥାନକୁ ଟାର୍ଗେଟ୍ କରାଯାଇ ଏହି ଆକ୍ରମଣ କରାଯାଇଥିଲା। ଏହି ମିଶନର ସଫଳତା ପାଇଁ ସ୍ୱତନ୍ତ୍ର ସୁରକ୍ଷା ବାହିନୀ ଓ ଗୁପ୍ତଚର ସଂସ୍ଥାଗୁଡ଼ିକ ମିଳିତ ଭାବେ କାର୍ଯ୍ୟ କରୁଥିଲେ। ଗୁଇରେରୋ ପୂର୍ବରୁ ଭେନେଜୁଏଲାର ଏକ ଜେଲରୁ ଫେରାର୍ ହୋଇଯାଇଥିଲା ଏବଂ ତାକୁ ଧରିବା ପାଇଁ ଆମେରିକା ସରକାର ଲକ୍ଷ ଲକ୍ଷ ଡଲାରର ପୁରସ୍କାର ରାଶି ମଧ୍ୟ ଘୋଷଣା କରିଥିଲେ।
ଟ୍ରମ୍ପଙ୍କ କଡ଼ା ଆଭିମୁଖ୍ୟ
ଏହି ସଫଳତା ପରେ ଟ୍ରମ୍ପ ବିଶ୍ୱର ଅନ୍ୟାନ୍ୟ ଅପରାଧିକ ସଂଗଠନଗୁଡ଼ିକୁ ଚେତାବନୀ ଦେଇଛନ୍ତି। ସେ ସ୍ପଷ୍ଟ କରିଛନ୍ତି ଯେ, ଯେଉଁମାନେ ଆମେରିକାର ନାଗରିକଙ୍କ ସୁରକ୍ଷା ପ୍ରତି ବିପଦ ସୃଷ୍ଟି କରିବେ, ସେମାନଙ୍କୁ ଦୁନିଆର ଯେକୌଣସି କୋଣରୁ ଖୋଜି ବାହାର କରାଯାଇ ଦଣ୍ଡ ଦିଆଯିବ। ଆମେ ଆମ ସୀମା ଏବଂ ନାଗରିକଙ୍କ ସୁରକ୍ଷା ପାଇଁ ସଦାସର୍ବଦା ପ୍ରସ୍ତୁତ। ସୀମାପାର ଅପରାଧ ଏବଂ ଏଭଳି ରକ୍ତମୁଖା ଗ୍ୟାଙ୍ଗଗୁଡ଼ିକୁ ସମ୍ପୂର୍ଣ୍ଣ ଭାବେ ଧ୍ୱଂସ କରିବା ଆମର ପ୍ରାଥମିକତା ବୋଲି ସନ୍ଦେଶ ଦେଇଛନ୍ତି ଟ୍ରମ୍ପ ।
