ତେଲଠୁ ନେଇ ପରମାଣୁ ପର୍ଯ୍ୟନ୍ତ… ଇରାନ-ୟୁଏସ ରାଜିନାମାରେ କାହାକୁ ମିଳିବ କେତେ ଫାଇଦା ? ଜାଣନ୍ତୁ ପୂରା ଗଣିତ
ୱାଶିଂଟନ/ତେହେରାନ: ଦୀର୍ଘ ସାଢ଼େ ତିନି ମାସ ଧରି ଚାଲିଥିବା ଯୁଦ୍ଧ ପରେ ଶେଷରେ ଥମିଛି ଉତ୍ତେଜନା। ଦୁଇ ପାରମ୍ପରିକ ଶତ୍ରୁ ଆମେରିକା ଏବଂ ଇରାନ ପୁଣିଥରେ ଆଲୋଚନା ପଥ ଆପଣେଇଛନ୍ତି। ଉଭୟ ଦେଶ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ଅନ୍ତରୀଣ ଚୁକ୍ତି ସ୍ୱାକ୍ଷରିତ ହୋଇଛି। ଏହି ଚୁକ୍ତି ଫଳରେ ସାରା ବିଶ୍ୱକୁ ଏକ ବଡ଼ ଆଶ୍ୱସ୍ତି ମିଳିବାକୁ ଯାଉଥିବା ବେଳେ ବଜାରରେ ଅଶୋଧିତ ତେଲର ଦାମ ହ୍ରାସ ପାଇବା ନେଇ ସମ୍ଭାବନା ସୃଷ୍ଟି ହୋଇଛି।
ଇରାନକୁ ମିଳିଲା ବଡ଼ ଆର୍ଥିକ ଆଶ୍ୱସ୍ତି
ଏହି ନୂତନ ଚୁକ୍ତି ଅନୁଯାୟୀ, ଆମେରିକା ପକ୍ଷରୁ ଇରାନ ଉପରେ ଲଗାଯାଇଥିବା ତେଲ ରପ୍ତାନି କଟକଣାକୁ ତତ୍କାଳ ପ୍ରଭାବରୁ ହଟାଇ ଦିଆଯାଇଛି। ଏହାର ସିଧାସଳଖ ଲାଭ ଇରାନକୁ ମିଳିବ ଏବଂ ଦେଶଟି ପୁଣିଥରେ ବିଶ୍ୱ ବଜାରରେ ମୁକ୍ତ ଭାବେ ନିଜର ଅଶୋଧିତ ତେଲ ବିକ୍ରି କରିପାରିବ। ଯୁଦ୍ଧ ଏବଂ କଟକଣା ଯୋଗୁଁ ଇରାନର ଅର୍ଥନୀତି ସମ୍ପୂର୍ଣ୍ଣ ଭୁଶୁଡ଼ି ପଡ଼ିଥିଲା। ପୂର୍ବରୁ କେବଳ ଚୀନ୍ ଗୁପ୍ତ ଟାଙ୍କର ଜରିଆରେ ଇରାନଠାରୁ କମ୍ ଦାମରେ ତେଲ କିଣୁଥିଲା। କିନ୍ତୁ ଏବେ କଟକଣା ହଟିବା ପରେ ଇରାନ ଦୁନିଆରେ ନୂଆ ଗ୍ରାହକଙ୍କୁ ତେଲ ବିକ୍ରି କରିପାରିବ, ଯାହା ତାର ଅର୍ଥନୀତିକୁ ସୁଧାରିବାରେ ସାହାଯ୍ୟ କରିବ।
Also Read: ନିଆଁ ଲଗାଇବା ଶିଖିବା ପୂର୍ବରୁ, ଏହାକୁ ସାଥିରେ ଧରି ବୁଲୁଥିଲା ମଣିଷ; ୧୭ ଲକ୍ଷ ବର୍ଷ ପୁରୁଣା ହାଡ଼ରୁ ମିଳିଲା ପ୍ରମାଣ
ଖୋଲିବ ‘ଷ୍ଟ୍ରେଟ୍ ଅଫ୍ ହୋର୍ମୁଜ୍’
ଚୁକ୍ତିର ଅନ୍ୟ ଏକ ବଡ଼ ଦିଗ ହେଉଛି ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ସାମୁଦ୍ରିକ ବାଣିଜ୍ୟ ପଥ ‘ଷ୍ଟ୍ରେଟ୍ ଅଫ୍ ହୋର୍ମୁଜ୍’ କୁ ପୁଣିଥରେ ଖୋଲାଯିବ। ଆମେରିକା ମଧ୍ୟ ଇରାନର ବନ୍ଦରଗୁଡ଼ିକରୁ ନିଜର ନୌସେନା ଅବରୋଧ ହଟାଇବାକୁ ସହମତି ପ୍ରକାଶ କରିଛି। ଯୁଦ୍ଧ ପୂର୍ବରୁ ସାରା ବିଶ୍ୱକୁ ଯୋଗାଣ ହେଉଥିବା ତେଲର ପ୍ରାୟ ୨୦ ପ୍ରତିଶତ ଏହି ପଥ ଦେଇ ଯାଉଥିଲା, ଯାହା ଯୁଦ୍ଧ ସମୟରେ ବନ୍ଦ ହୋଇଯାଇଥିଲା।
ଟ୍ରମ୍ପଙ୍କ ସାମ୍ନାରେ ୬୦ ଦିନର ବଡ଼ ଚ୍ୟାଲେଞ୍ଜ
ଏହି ସାମୟିକ ଚୁକ୍ତି ପରେ ଇରାନ ଏବଂ ଆମେରିକା ମଧ୍ୟରେ ଆଗାମୀ ୬୦ ଦିନ ପର୍ଯ୍ୟନ୍ତ ଏକ ଘନିଷ୍ଠ ଆଲୋଚନା ପ୍ରକ୍ରିୟା ଚାଲିବ। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସାମ୍ନାରେ ଏବେ ସବୁଠାରୁ ବଡ଼ ପ୍ରଶ୍ନ ହେଉଛି, ସେ ଇରାନର ପରମାଣୁ କାର୍ଯ୍ୟକ୍ରମକୁ ରୋକିବା ପାଇଁ ୨୦୧୫ର ଐତିହାସିକ ଚୁକ୍ତି ଠାରୁ କୌଣସି ଅଧିକ କଠୋର ସ୍ଥାୟୀ ସର୍ତ୍ତ ରଖିପାରୁଛନ୍ତି କି ନାହିଁ। ସୂଚନାଯୋଗ୍ୟ ଯେ, ଟ୍ରମ୍ପ ନିଜେ ୮ ବର୍ଷ ପୂର୍ବେ ୨୦୧୫ର ସେହି ପରମାଣୁ ଚୁକ୍ତିକୁ ବାତିଲ କରିଦେଇଥିଲେ।
Also Read: ‘ଆକ୍ରମଣ ସମ୍ପୂର୍ଣ୍ଣ ଭାବେ ଠିକ୍’ : ମସ୍କୋରେ ଧ୍ୱଂସଳୀଳା ପାଇଁ ପୁଟିନଙ୍କୁ ଦାୟୀ କଲେ ଜେଲେନସ୍କି
ପୁନର୍ନିମାଣ ପାଇଁ ୩୦୦ ବିଲିୟନ ଡଲାରର ପ୍ୟାକେଜ୍ !
ରିପୋର୍ଟ ଅନୁଯାୟୀ, ଯଦି ସ୍ଥାୟୀ ପରମାଣୁ ଚୁକ୍ତି ସଫଳ ହୁଏ, ତେବେ ଇରାନ ଉପରୁ ସମସ୍ତ ଆନ୍ତର୍ଜାତୀୟ କଟକଣା ହଟାଇ ଦିଆଯିବ। ଏହାସହ ବିଦେଶରେ ଅଟକି ରହିଥିବା ଇରାନର କୋଟି କୋଟି ଟଙ୍କାର ସମ୍ପତ୍ତି ଫେରସ୍ତ କରାଯିବ। ଯୁଦ୍ଧ ପରବର୍ତ୍ତୀ ପୁନର୍ନିମାଣ ପାଇଁ ଏକ ୩୦୦ ବିଲିୟନ ଡଲାରର ସ୍ୱତନ୍ତ୍ର ପାଣ୍ଠି ଗଠନ ନେଇ ମଧ୍ୟ ଚର୍ଚ୍ଚା ହେଉଛି, ଯଦିଓ ଆମେରିକା ଏଥିରେ କୌଣସି ଆର୍ଥିକ ସହାୟତା ଦେବ ନାହିଁ ବୋଲି ଟ୍ରମ୍ପ ସ୍ପଷ୍ଟ କରିସାରିଛନ୍ତି।
କେତେକ ପ୍ରସଙ୍ଗରେ ଏବେ ବି ଅସ୍ପଷ୍ଟତା
ତେବେ ଏହି ଚୁକ୍ତିରେ ଇରାନର ବାଲିଷ୍ଟିକ ମିସାଇଲ କାର୍ଯ୍ୟକ୍ରମ କିମ୍ବା ତାର ସହଯୋଗୀ ସଂଗଠନ (ଯେପରିକି ହିଜବୁଲ୍ଲା, ହୁତି ବିଦ୍ରୋହୀ) ମାନଙ୍କୁ ନେଇ କୌଣସି ସ୍ପଷ୍ଟ ନିୟମ ରଖାଯାଇ ନାହିଁ। ସେହିପରି ଲେବନାନ୍ ଯୁଦ୍ଧ ଶେଷ କରିବାକୁ କୁହାଯାଇଥିଲେ ବି ଇସ୍ରାଏଲ୍ ଏବଂ ହିଜବୁଲ୍ଲା ଏହି ଚୁକ୍ତିର ଅଂଶବିଶେଷ ନୁହନ୍ତି। ତେଣୁ ଅନେକ ପ୍ରତିରକ୍ଷା ବିଶେଷଜ୍ଞ ଏହାକୁ ଏକ ଅଧୁରା ଚୁକ୍ତି ବୋଲି ମଧ୍ୟ ଅଭିହିତ କରୁଛନ୍ତି।
