NEET-UG 2026: ରବିବାର ଆବୁଧାବିରେ କେମିତି ପରୀକ୍ଷା ଦେବେ ଛାତ୍ର ? ତ୍ରୁଟି ଥିବା ଦାବିକୁ ପ୍ରତ୍ୟାଖ୍ୟାନ କଲା NTA

ନୂଆଦିଲ୍ଲୀ: ରାଷ୍ଟ୍ରୀୟ ପରୀକ୍ଷା ଏଜେନ୍ସି (NTA) ବର୍ତ୍ତମାନ NEET-UG 2026 ପରୀକ୍ଷାକୁ ନେଇ ସୃଷ୍ଟି ହୋଇଥିବା ଏକ ବଡ଼ ବିବାଦ ଉପରେ ସ୍ପଷ୍ଟୀକରଣ ଦେଇଛି। ଜୁନ୍ ୨୧ ରେ ହେବାକୁ ଥିବା ପରୀକ୍ଷାର ଠିକ୍ ଦିନକ ପୂର୍ବରୁ ଏହି ମାମଲା ସାମ୍ନାକୁ ଆସିଛି। ନାଗପୁରର ଜଣେ ପରୀକ୍ଷାର୍ଥୀଙ୍କୁ ଭାରତ ବଦଳରେ ସୁଦୂର ଆବୁଧାବିରେ ପରୀକ୍ଷା କେନ୍ଦ୍ର ଆଲଟ୍ କରାଯାଇଥିବା ନେଇ ଅଭିଯୋଗ ହୋଇଥିଲା। ଏହାକୁ ନେଇ ପ୍ରଥମେ ବୈଷୟିକ ତ୍ରୁଟି (Technical Glitch) ର ସନ୍ଦେହ କରାଯାଉଥିବା ବେଳେ, ଏବେ NTA ସମସ୍ତ ଅଭିଯୋଗକୁ ଖଣ୍ଡନ କରିଛି। ଏଜେନ୍ସି ପକ୍ଷରୁ କୁହାଯାଇଛି ଯେ, ଛାତ୍ର ଜଣକ ନିଜେ ନିଜ ଲଗ୍-ଇନ୍ ଆଇଡି ବ୍ୟବହାର କରି ଆବୁଧାବି ସହରକୁ ପରୀକ୍ଷା କେନ୍ଦ୍ର ଭାବେ ବାଛିଥିଲେ।

ପ୍ରକୃତ ଘଟଣା କ’ଣ ଥିଲା?

ନାଗପୁରର ଜଣେ ଛାତ୍ର NEET-UG ପରୀକ୍ଷା ପାଇଁ ଆବେଦନ କରିଥିଲେ। କିନ୍ତୁ ଆଡମିଟ୍ କାର୍ଡ ଆସିବା ପରେ ଦେଖାଗଲା ଯେ, ତାଙ୍କର ପରୀକ୍ଷା କେନ୍ଦ୍ର ୟୁଏଇ (UAE) ର ଆବୁଧାବି ସହରରେ ପଡ଼ିଛି। ଛାତ୍ର ଏବଂ ତାଙ୍କ ପରିବାର ଲୋକେ ଦାବି କରିଥିଲେ ସେମାନେ କେବେ ବି ବିଦେଶରେ ପରୀକ୍ଷା ଦେବାକୁ ଆବେଦନ କରିନାହାନ୍ତି ଏବଂ ଏହା NTA ର ସିଷ୍ଟମରେ ଥିବା କୌଣସି ଗଡ଼ବଡ଼ ଯୋଗୁଁ ହୋଇଛି। ଏହି ଖବର ଗଣମାଧ୍ୟମ ଓ ସୋସିଆଲ ମିଡିଆରେ ବ୍ୟାପିବା ପରେ NTA ର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଥିଲା।

ଡିଜିଟାଲ୍ ରେକର୍ଡରୁ ମିଳିଲା ପ୍ରମାଣ

ବିବାଦ ବଢ଼ିବା ପରେ ନ୍ୟାସନାଲ ଟେଷ୍ଟିଂ ଏଜେନ୍ସି ନିଜର ଆଇଟି (IT) ସିଷ୍ଟମ ଓ ୱେବ୍-ଆକ୍ଟିଭିଟି ରେକର୍ଡଗୁଡ଼ିକର ଯାଞ୍ଚ କରିଥିଲା। ଯାଞ୍ଚ ରିପୋର୍ଟ ଆଧାରରେ NTA ଏକ ସରକାରୀ ବିବୃତ୍ତି ଜାରି କରି କହିଛି । ଆବେଦନପତ୍ର ସଂଶୋଧନ ପାଇଁ ଦିଆଯାଇଥିବା ସମୟ (Correction Window) ମଧ୍ୟରେ ହିଁ ପରୀକ୍ଷା ସହର ପରିବର୍ତ୍ତନ କରାଯାଇଥିଲା। ଛାତ୍ରଙ୍କର ନିଜସ୍ୱ ପଞ୍ଜୀକୃତ ଲଗ୍-ଇନ୍ କ୍ରେଡେନ୍ସିଆଲ୍ସ (ୟୁଜର୍ ଆଇଡି ଏବଂ ପାସୱାର୍ଡ) ବ୍ୟବହାର କରି ଏହି ପରିବର୍ତ୍ତନ କରାଯାଇଛି। ସର୍ଭରରେ କୌଣସି ବାହ୍ୟ ହ୍ୟାକିଂ କିମ୍ବା ଅନଧିକୃତ ପ୍ରବେଶର ଚିହ୍ନ ମିଳିନାହିଁ।

ଲଗ୍-ଇନ୍ ଆକ୍ଟିଭିଟିରୁ ଜଣାପଡ଼ିଛି ଯେ, ଯେଉଁ ଆଇପି ଆଡ୍ରେସ ବା ଡିଭାଇସରୁ ନିୟମିତ ଭାବେ ଆବେଦନପତ୍ର ଖୋଲାଯାଉଥିଲା, ସେହି ସମାନ ଡିଭାଇସରୁ ହିଁ ଆବୁଧାବି ସହରକୁ ଚୟନ କରାଯାଇଛି । ଡିଜିଟାଲ୍ ଲଗ୍ ରେକର୍ଡ ସ୍ପଷ୍ଟ କରୁଛି ଯେ, ଏଥିରେ କୌଣସି ବୈଷୟିକ ତ୍ରୁଟି ବା ସିଷ୍ଟମ୍ ମାଲଫଙ୍କସନ୍ ହୋଇନାହିଁ। ପରୀକ୍ଷାର୍ଥୀ ନିଜର ପ୍ରାମାଣିକ ତଥ୍ୟ ଦେଇ ସହର ବଦଳାଇଥିଲେ।

ପରୀକ୍ଷାର ଠିକ୍ ପୂର୍ବ ଦିନ ଏଭଳି ଏକ ସ୍ପଷ୍ଟୀକରଣ ଆସିବା ପରେ ଏବେ ଛାତ୍ର ଜଣକ ଭାରତରେ ପରୀକ୍ଷା ଦେଇପାରିବେ କି ନାହିଁ, ସେ ନେଇ ଆଶଙ୍କା ଦେଖାଦେଇଛି। କାରଣ ଏତେ କମ୍ ସମୟ ମଧ୍ୟରେ ଆବୁଧାବି ଯାଇ ପରୀକ୍ଷା ଦେବା ପ୍ରାୟତଃ ଅସମ୍ଭବ। ଅନ୍ୟପଟେ, NTA ନିଜ ଆଡୁ ସ୍ପଷ୍ଟ କରିଦେଇଛି ଯେ, ସେମାନଙ୍କର ପ୍ରକ୍ରିୟା ସମ୍ପୂର୍ଣ୍ଣ ସ୍ୱଚ୍ଛ ଏବଂ ଏଥିରେ ବୋର୍ଡର କୌଣସି ଭୁଲ୍ ନାହିଁ।