FIFA ବିଶ୍ୱକପରେ ସମ୍ମାନର ଲଢ଼େଇ: କେଉଁ ପୁରସ୍କାର ପାଇଁ ମେସି ଓ ଏମ୍ବାପେ ମଧ୍ୟରେ ପ୍ରତିଦ୍ୱନ୍ଦ୍ୱିତା; ମୋଟ କେତେ ପୁରସ୍କାର ପ୍ରଦାନ କରାଯିବ ?
ନୂଆଦିଲ୍ଲୀ: ଏକ ମାସରୁ ଅଧିକ ସମୟ ଧରି ଚାଲିଥିବା ଫିଫା ବିଶ୍ୱକପ୍ ୨୦୨୬ର ଆଜି ଶେଷ ମ୍ୟାଚ୍ । ରାତି ୧୨.୩୦ ମିନିଟରେ ଆର୍ଜେଣ୍ଟିନା ଏବଂ ସ୍ପେନର ନଜର ବିଶ୍ୱକପର ସବୁଠାରୁ ପ୍ରତିଷ୍ଠିତ ଟ୍ରଫି ଉପରେ ରହିବ । ଆର୍ଜେଣ୍ଟିନା ଚାରିଥର ବିଶ୍ୱ ଚାମ୍ପିଅନ୍ ପାଇଁ ଲକ୍ଷ୍ୟ ରଖିବ ଏବଂ ସ୍ପେନର ଦ୍ୱିତୀୟ ଥର ପାଇଁ ଏହି ଟ୍ରଫି ଉଠାଇବାକୁ ଚାହିଁବ । ତେବେ ଫାଇନାଲ୍ ମୁକାବିଲା ଏବଂ ଏହା ପରର ସମାରୋହ କେବଳ ବିଜେତା ଓ ଉପ-ବିଜେତାଙ୍କ ସମ୍ମାନରେ ସୀମିତ ରହିବ ନାହିଁ । ଏହି ଟୁର୍ଣ୍ଣାମେଣ୍ଟରେ ଚମତ୍କାର ପ୍ରଦର୍ଶନ କରିଥିବା ଖେଳାଳିମାନଙ୍କୁ ମଧ୍ୟ ସମ୍ମାନିତ କରାଯିବ ।
ଫିଫା ବିଶ୍ୱକପର ଫାଇନାଲ୍ ମ୍ୟାଚ୍ ପରେ ଅନୁଷ୍ଠିତ ହେବାକୁ ଥିବା ପୁରସ୍କାର ବିତରଣ ସମାରୋହରେ କେଉଁ କେଉଁ ପୁରସ୍କାର ଦିଆଯିବ, ତାହା ଉପରେ ନଜର ପକାନ୍ତୁ ।
ଫିଫା ବିଶ୍ୱକପରେ ବିଜେତା ଟ୍ରଫି ବ୍ୟତୀତ ଖେଳାଳି ଏବଂ ଦଳଗୁଡ଼ିକର ଶ୍ରେଷ୍ଠ ପ୍ରଦର୍ଶନକୁ ପ୍ରଶଂସା କରିବା ପାଇଁ ଅନେକ ବ୍ୟକ୍ତିଗତ ଏବଂ ଦଳଗତ ସମ୍ମାନ ପ୍ରଦାନ କରାଯାଇଥାଏ ।
ପଦକ: ବିଜେତା ଦଳର ସମସ୍ତ ଖେଳାଳି ଏବଂ କୋଚିଂ ଷ୍ଟାଫ୍ଙ୍କୁ ସ୍ୱର୍ଣ୍ଣ ପଦକ ଦିଆଯାଏ । ଉପ-ବିଜେତାଙ୍କୁ ରୌପ୍ୟ ପଦକ ଏବଂ ତୃତୀୟ ସ୍ଥାନରେ ଥିବା ଦଳକୁ କାଂସ୍ୟ ପଦକ ମିଳିଥାଏ । ଏହା ବ୍ୟତୀତ, ଫାଇନାଲ୍ ମ୍ୟାଚ୍ର ଅଫିସିଆଲମାନଙ୍କୁ ମଧ୍ୟ ସେମାନଙ୍କ ପ୍ରଦର୍ଶନ ଆଧାରରେ ପଦକ ପ୍ରଦାନ କରାଯାଏ ।
ଗୋଲ୍ଡେନ୍ ବୁଟ୍: ଏହି ପୁରସ୍କାର ଟୁର୍ଣ୍ଣାମେଣ୍ଟରେ ସବୁଠାରୁ ଅଧିକ ଗୋଲ୍ ଦେଇଥିବା ଖେଳାଳିଙ୍କୁ ଦିଆଯାଏ । ଯଦି ଖେଳାଳିମାନଙ୍କର ଗୋଲ ସଂଖ୍ୟା ସମାନ ରହେ, ତେବେ ସବୁଠାରୁ ଅଧିକ ଆସିଷ୍ଟ କରିଥିବା କିମ୍ବା ସବୁଠାରୁ କମ୍ ସମୟ ଖେଳି ଗୋଲ୍ କରିଥିବା ଖେଳାଳିଙ୍କୁ ଚୟନ କରାଯାଏ । ଦ୍ୱିତୀୟ ଏବଂ ତୃତୀୟ ସର୍ବାଧିକ ଗୋଲ୍ କରିଥିବା ଖେଳାଳିଙ୍କୁ ସିଲ୍ଭର୍ ବୁଟ୍ ଏବଂ ବ୍ରୋଞ୍ଜ ବୁଟ୍ ଦିଆଯାଏ ।
ଗୋଲ୍ଡେନ୍ ବଲ୍: ଏହି ସମ୍ମାନ ଟୁର୍ଣ୍ଣାମେଣ୍ଟର ସର୍ବଶ୍ରେଷ୍ଠ ଖେଳାଳିଙ୍କୁ ପ୍ରଦାନ କରାଯାଏ । ଫିଫାର ବୈଷୟିକ ଗ୍ରୁପ୍ ଦ୍ୱାରା ପ୍ରସ୍ତୁତ ସର୍ଟଲିଷ୍ଟ ଆଧାରରେ ଗଣମାଧ୍ୟମ ପ୍ରତିନିଧିମାନେ ଏଥିପାଇଁ ଭୋଟ୍ ଦିଅନ୍ତି । ଦ୍ୱିତୀୟ ଏବଂ ତୃତୀୟ ସ୍ଥାନରେ ଥିବା ଖେଳାଳିଙ୍କୁ ସିଲଭର୍ ବଲ୍ ଏବଂ ବ୍ରୋଞ୍ଜ ବଲ ଦିଆଯାଏ ।
ଗୋଲ୍ଡେନ୍ ଗ୍ଲୋଭ୍: ଟୁର୍ଣ୍ଣାମେଣ୍ଟରେ ଚମତ୍କାର ସେଭ୍ ଏବଂ କ୍ଲିନ୍ ଶିଟ୍ ଆଧାରରେ ସର୍ବଶ୍ରେଷ୍ଠ ଗୋଲକିପରଙ୍କୁ ଏହି ପୁରସ୍କାର ଦିଆଯାଏ ।
ବେଷ୍ଟ ଇମର୍ଜିଂ ପ୍ଲେୟାର/ୟଙ୍ଗ ପ୍ଲେୟାର ଆୱାର୍ଡ: ଟୁର୍ଣ୍ଣାମେଣ୍ଟରେ ପ୍ରଭାବ ପକାଇଥିବା ସର୍ବଶ୍ରେଷ୍ଠ ଯୁବ ଖେଳାଳିଙ୍କୁ (୨୧ ବର୍ଷରୁ କମ୍ ବୟସ୍କ) ଏହି ସମ୍ମାନ ଦିଆଯାଏ ।
ଫେୟାର୍ ପ୍ଲେ’ ଆୱାର୍ଡ: ଟୁର୍ଣ୍ଣାମେଣ୍ଟରେ ସବୁଠାରୁ ଅଧିକ ଶୃଙ୍ଖଳିତ ଏବଂ କ୍ରୀଡ଼ା ମନୋଭାବ ପ୍ରଦର୍ଶନ କରିଥିବା ଦଳକୁ ଏହି ପୁରସ୍କାର ପ୍ରଦାନ କରାଯାଏ ।
ଗୋଲ୍ ଅଫ୍ ଦି ଟୁର୍ଣ୍ଣାମେଣ୍ଟ: ଏହି ପୁରସ୍କାର ଟୁର୍ଣ୍ଣାମେଣ୍ଟର ସର୍ବଶ୍ରେଷ୍ଠ ଗୋଲ୍ ପାଇଁ ଦିଆଯାଏ, ଯାହାର ନିଷ୍ପତ୍ତି ଫୁଟବଲ୍ ପ୍ରଶଂସକମାନଙ୍କ ଭୋଟିଂ ଦ୍ୱାରା ହୋଇଥାଏ ।
ମୋଷ୍ଟ ଏଣ୍ଟରଟେନିଂ ଟିମ୍: ଟୁର୍ଣ୍ଣାମେଣ୍ଟ ସମୟରେ ଖେଳ ପ୍ରତି ସକାରାତ୍ମକ ଆଭିମୁଖ୍ୟ ରଖି ଦର୍ଶକମାନଙ୍କୁ ସବୁଠାରୁ ଅଧିକ ମନୋରଞ୍ଜନ କରିଥିବା ଦଳକୁ ଲୋକଙ୍କ ଭୋଟ୍ ମାଧ୍ୟମରେ ଏହି ପୁରସ୍କାର ଦିଆଯାଏ ।
