ଖଲ୍ଲିକୋଟ ୧୨।୧୧ : ଖଲ୍ଲିକୋଟରେ ଭୟଙ୍କର ବିସ୍ଫୋରଣ । ଗଞ୍ଜାମ ଜିଲ୍ଲା ଖଲ୍ଲିକୋଟ ଅରବିନ୍ଦ ନଗର ଦ୍ୱିତୀୟ ଲାଇନରେ ଥିବା ଏକ ଘରେ ଜୋରଦାର ବିସ୍ଫୋରଣ ହୋଇଛି । ଏହି ବିସ୍ଫୋରଣକୁ ନେଇ ସ୍ଥାନୀୟ ଅଞ୍ଚଳରେ ଖେଳିଯାଇଛି ଆତଙ୍କ। ବିସ୍ଫୋରଣର ପ୍ରଚଣ୍ଡ ଶବ୍ଦରେ ଆଖପାଖ ଅଞ୍ଚଳ ଥରି ଉଠିଥିବା ବେଳେ ଲୋକଙ୍କ ମଧ୍ୟରେ ଭୟର ବାତାବରଣ ଦେଖାଦେଇଛି।
ଖବର ଅନୁଯାୟୀ, ବିସ୍ଫୋରଣର ତୀବ୍ରତା ଏତେ ଅଧିକ ଥିଲା ଯେ ଘରର ଗ୍ରୀଲ୍ ଉପୁଡ଼ି ଯାଇଥିବା ବେଳେ କାନ୍ଥ ମଧ୍ୟ ଭୁଶୁଡ଼ି ପଡ଼ିଛି। ଘଟଣାସ୍ଥଳରେ ବିସ୍ଫୋରଣର ଭୟାବହତା ସ୍ପଷ୍ଟ ବାରି ହୋଇପଡ଼ୁଛି। ଘରର ଗ୍ରୀଲ୍ ଓ କାନ୍ଥର ଏଭଳି ଅବସ୍ଥା ଦେଖି ବିସ୍ଫୋରଣ କେତେ ଭୟଙ୍କର ଥିଲା, ତାହା ଅନୁମାନ କରାଯାଇପାରୁଛି।
Also Read:-Nvidia Conflict : କର୍ମଚାରୀଙ୍କୁ କ୍ଷମା ମାଗିଲେ ଏନଭିଡିଆ CEO : କହିଲେ ‘ଭୁଲକୁ ସୁଧାରି ହେବନି ‘
ସବୁଠାରୁ ଚିନ୍ତାଜନକ କଥା ହେଉଛି, ବିସ୍ଫୋରଣ ସମୟରେ ଘର ଭିତରେ ଦୁଇ ଜଣ ରହିଥିବା ବେଳେ ସେମାନେ ଗୁରୁତର ହୋଇଛନ୍ତି। ବର୍ତ୍ତମାନ ସୁଦ୍ଧା ଆହତଙ୍କ ପରିଚୟ ଏବଂ ସେମାନଙ୍କ ସ୍ୱାସ୍ଥ୍ୟାବସ୍ଥା ସମ୍ପର୍କରେ ବିସ୍ତୃତ ତଥ୍ୟ ମିଳିନାହିଁ। କେଉଁ କାରଣରୁ ଏତେ ବଡ଼ ବିସ୍ଫୋରଣ ଘଟିଲା, ତାହା ଏଯାଏଁ ସ୍ପଷ୍ଟ ହୋଇନାହିଁ। ଏହା ପଛରେ କୌଣସି ବିସ୍ଫୋରକ ସାମଗ୍ରୀ ଥିଲା ନା ଅନ୍ୟ କିଛି କାରଣ, ସେନେଇ ଉଠିଛି ଅନେକ ପ୍ରଶ୍ନ। ଘଟଣାର ପ୍ରକୃତ କାରଣ ତଦନ୍ତ ପରେ ହିଁ ସ୍ପଷ୍ଟ ହେବ।
ଖଲ୍ଲିକୋଟ୍ର ଜନବସତିପୂର୍ଣ୍ଣ ଅରବିନ୍ଦ ନଗରରେ ଏଭଳି ବିସ୍ଫୋରଣ ଘଟିବା ପରେ ସ୍ଥାନୀୟ ଲୋକଙ୍କ ମଧ୍ୟରେ ଭୟ ଓ ଆଶଙ୍କା ବଢ଼ିଛି। ଏହି ବିସ୍ଫୋରଣ କିପରି ଘଟିଲା, ଘର ଭିତରେ କେଉଁ ସାମଗ୍ରୀ ରହିଥିଲା ଏବଂ ଏଥିପାଇଁ କିଏ ଦାୟୀ, ତାହା ଏବେ ତଦନ୍ତର ବିଷୟ। ଖଲ୍ଲିକୋଟ୍ରେ ଏହି ଭୟଙ୍କର ବିସ୍ଫୋରଣକୁ ନେଇ ଏବେ ସମସ୍ତଙ୍କ ନଜର ତଦନ୍ତ ଉପରେ।
