Colombia Quake Update: ଭୂମିକମ୍ପ ଯୋଗୁଁ ଗଲାଣି ୪୭ ଜୀବନ, ଧ୍ବଂସାବଶେଷ ତଳେ ଫସି ରହିଛନ୍ତି ଅନେକ ଲୋକ
ନୂଆଦିଲ୍ଲୀ: କଲମ୍ବିଆରେ ଆସିଥିବା ଭୟଙ୍କର ଭୂମିକମ୍ପ ଯୋଗୁଁ ୪୭ ଜଣଙ୍କ ଜୀବନ ଯାଇଛି । ଅନେକ ଲୋକ ଭଗ୍ନାବଶେଷ ତଳେ ଚାପି ହୋଇ ରହିଥିବା ବେଳେ ଉଦ୍ଧାରକାର୍ଯ୍ୟ ଜାରି ରହିଛି । ୭.୪ ତୀବ୍ରତାରେ ଆସିଥିବା ଏହି ଭୂମିକମ୍ପରେ ଅନେକ ଘର ଭୁଶୁଡ଼ି ପଡ଼ିଛି । ଯୁକ୍ତରାଷ୍ଟ୍ର ଭୂବୈଜ୍ଞାନିକ ସର୍ବେକ୍ଷଣ (USGS) ଅନୁଯାୟୀ, ସ୍ଥାନୀୟ ସମୟ ସକାଳ ୭:୩୪ରେ ଏହି ଭୂମିକମ୍ପ ଅନୁଭୂତ ହୋଇଥିଲା । କଲମ୍ବିଆର ଚୋକୋ ବିଭାଗସ୍ଥିତ ‘ସାନ ଜୋସ୍ ଡେଲ୍ ପାଲମାର୍’ର ପୂର୍ବ ଦିଗରୁ ପ୍ରାୟ ୫ କିଲୋମିଟର ଦୂରରେ ଏବଂ ଭୂପୃଷ୍ଠରୁ ୧୦୭ କିଲୋମିଟର ଗଭୀରତାରେ ଏହାର କେନ୍ଦ୍ରବିନ୍ଦୁ ରହିଥିଲା।
ସହରର ମେୟରଙ୍କ ସୂଚନା ଅନୁଯାୟୀ, ସେଠାରେ ଭୂମିକମ୍ପ ଯୋଗୁଁ ୧୮ ଜଣଙ୍କର ମୃତ୍ୟୁ ହୋଇଛି। ମାନିଜାଲେସର ମେୟର ବିଏଲୟୁ (BLU) ରେଡିଓକୁ ସୂଚନା ଦେଇ କହିଛନ୍ତି ଯେ, ସହରରେ ୨ ଜଣ ପ୍ରାଣ ହରାଇଛନ୍ତି। କାଲି ସହରର ମେୟର ଆଲେଜାଣ୍ଡ୍ରୋ ଏଡର ସୂଚନା ଦେଇଛନ୍ତି ଯେ, ସହରରେ ପ୍ରାୟ ୨୦ଟି କୋଠା ସମ୍ପୂର୍ଣ୍ଣ ଭୁଶୁଡ଼ି ଯାଇଛି ଏବଂ ସେଥିରେ ବହୁ ଲୋକ ଚାପି ହୋଇ ରହିଛନ୍ତି। ସେ ବୋଗୋଟା ଏବଂ ମେଡେଲିନ୍ର ମେୟରଙ୍କ ନିକଟରୁ ଜରୁରୀକାଳୀନ ଉଦ୍ଧାରକାରୀ ଦଳର ସହାୟତା ମାଗିଛନ୍ତି।
ଚୋକୋ ଏବଂ କ୍ୱିବଡୋ ଗଭର୍ଣ୍ଣର ନୁବିଆ କାରୋଲିନା କୋର୍ଡୋବା-କୁରୀ କହିଛନ୍ତି ଯେ, ପ୍ରାଦେଶିକ ରାଜଧାନୀ କ୍ୱିବଡୋରେ ବ୍ୟାପକ କ୍ଷୟକ୍ଷତି ଘଟିବା ସହ ଅନେକ ଲୋକ ଆହାତ ହୋଇଛନ୍ତି। ଆମେରିକା ସୁନାମୀ ଚେତାବନୀ ପ୍ରଣାଳୀ ଅନୁଯାୟୀ, କଲମ୍ବିଆର ପ୍ରଶାନ୍ତ ମହାସାଗରୀୟ ଉପକୂଳରେ କୌଣସି ସୁନାମୀ ଭୟ ନାହିଁ। ତେବେ କଲମ୍ବିଆର ଦୂରଦୂରାନ୍ତ ଅଞ୍ଚଳ ସମେତ ପଡ଼ୋଶୀ ଭେନେଜୁଏଲା ସୀମାନ୍ତରେ ମଧ୍ୟ ଏହି ପ୍ରବଳ କମ୍ପନ ଅନୁଭୂତ ହୋଇଛି।
କାଲି ମେୟର ନାଗରିକମାନଙ୍କୁ ଧୈର୍ଯ୍ୟ ଧରିବାକୁ ଏବଂ କୋଠାରେ ବଡ଼ ଫାଟ ଦେଖାଗଲେ ତୁରନ୍ତ ସୁରକ୍ଷିତ ସ୍ଥାନକୁ ଚାଲିଯିବାକୁ ପରାମର୍ଶ ଦେଇଛନ୍ତି। ଚୋକୋ ଗଭର୍ଣ୍ଣର Aftershocksର ଆଶଙ୍କା ଥିବାରୁ ସମସ୍ତଙ୍କୁ ସତର୍କ ରହିବାକୁ କହିଛନ୍ତି।
