ମୁମ୍ବାଇ: ମହାରାଷ୍ଟ୍ରର ଏକ ବେକେରୀରେ ୨୦୨୩ ମସିହାରେ ହୋଇଥିବା ଦାଦାବଟି ଓ ଗୁଳିକାଣ୍ଡ ମାମଲାରେ ଅଣ୍ଡରୱାର୍ଲ୍ଡ ଡନ୍ ଦାଉଦ୍ ଇବ୍ରାହିମ୍ର ସହଯୋଗୀ ଅଖତର ମର୍ଚାଣ୍ଟକୁ ଦିଲ୍ଲୀ ବିମାନବନ୍ଦରରୁ ଗିରଫ କରାଯାଇଛି। ଦୀର୍ଘ ଦିନରୁ ପୁଲିସ ଖୋଜୁଥିବା ଅପରାଧୀ ଅଖତର ଦିଲ୍ଲୀ ବିମାନବନ୍ଦରରେ ପହଞ୍ଚିବା ପରେ ତାକୁ ହାଜତକୁ ନିଆଯାଇଛି। ପ୍ରାୟ ତିନି ବର୍ଷ ଧରି ବିଚାରାଧୀନ ଥିବା ଏହି ମାମଲାରେ ଏହି ଗିରଫଦାରୀ ଏକ ଗୁରୁତ୍ୱପୂର୍ଣ୍ଣ ମୋଡ଼ ଆଣିଛି।
ପୁଲିସ୍ ସୂଚନା ଅନୁସାରେ, କାଶୀମୀରା ଅଞ୍ଚଳରେ ଥିବା ଏକ ବେକେରୀରେ ଗୁଳିକାଣ୍ଡରେ ଅଖତର ସାମିଲ ଥିଲା । ଅଖତର ଏବଂ ନିସାର ଅହମ୍ମଦ ଶେଖ୍ ଓରଫ ‘ପପୁ ପେଜର’ ନାମକ ଅନ୍ୟ ଜଣେ ଅଭିଯୁକ୍ତ ମିଶି ଜଣେ ବ୍ୟବସାୟୀଙ୍କୁ ଟଙ୍କା ପାଇଁ ଧମକ ଦେଇଥିବା ପୁଲିସ୍ ସନ୍ଦେହ କରୁଛି। ଦାବି ମୁତାବକ ଟଙ୍କା ନମିଳିବାରୁ ବେକେରୀର କର୍ମଚାରୀଙ୍କୁ ଆକ୍ରମଣ କରିବା ପାଇଁ ଜଣେ ସୁଟକୁ ସୁପାରୀ ଦିଆଯାଇଥିଲା।
ଏହି ଆକ୍ରମଣ ଯୋଜନା ମୁତାବକ ହୋଇପାରି ନଥିଲା। ବନ୍ଧୁକଟି ଅଚଳ ହୋଇଯିବାରୁ ସୁଟର୍ ଗୁଳି ଚଳାଇବାରେ ଅସଫଳ ହୋଇଥିଲେ।
ଏହି ଘଟଣା ପରେ ପୁଲିସ୍ ଏହି ବେଆଇନ ବଟି ଆଦାୟ ନେଟୱାର୍କ ଏବଂ ଆକ୍ରମଣ ପଛରେ ଥିବା ବ୍ୟକ୍ତିମାନଙ୍କ ବିରୋଧରେ ତଦନ୍ତ ଆରମ୍ଭ କରିଥିଲା। ପୁଲିସ୍ ଏହି ମାମଲାରେ ହତ୍ୟା ଉଦ୍ୟମ, ଦାଦାବଟି ଆଦାୟ, ଅପରାଧିକ ଷଡ଼ଯନ୍ତ୍ର ପରି ଗୁରୁତର ଦଫା ସହ ଅସ୍ତ୍ରଶସ୍ତ୍ର ଆଇନ ଏବଂ ‘ମକୋକା’ (MCOCA – ମହାରାଷ୍ଟ୍ର ସଂଗଠିତ ଅପରାଧ ନିୟନ୍ତ୍ରଣ ଆଇନ) ଲଗାଇଥିଲା।
ମାମଲା ରୁଜୁ ହେବା ପରଠାରୁ ଅଖତର ଫେରାର ଥିଲା। ତା ଗତିବିଧି ଉପରେ ନଜର ରଖାଯାଇଥିଲା ଏବଂ ଭାରତୀୟ ସଂସ୍ଥାଗୁଡ଼ିକୁ ସୂଚନା ଦିଆଯାଇଥିଲା। ଶେଷରେ ଦିଲ୍ଲୀ ବିମାନବନ୍ଦରରେ ତାକୁ କାବୁ କରାଯାଇ ଗିରଫ କରାଯାଇଛି। କୁଖ୍ୟାତ ଅପରାଧୀ ଦାଉଦ୍ ଇବ୍ରାହିମ୍ର ସଂଗଠିତ ଅପରାଧ ନେଟୱାର୍କ ସହ ଅଖତରର ସମ୍ପୃକ୍ତି ଥିବାରୁ ଏହି ଗିରଫଦାରୀ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଗିରଫ ପରେ, ୨୦୨୩ ବେକେରୀ ମାମଲାରେ ତାର ଭୂମିକା, ଦାଦାବଟି ଆଦାୟ ଏବଂ ଏହି ଷଡ଼ଯନ୍ତ୍ରରେ ସାମିଲ ଅନ୍ୟ ବ୍ୟକ୍ତିଙ୍କ ବିଷୟରେ ପୁଲିସ୍ ତାକୁ ପଚରାଉଚୁରା କରିବ। ଫେରାର ଥିବା ସମୟରେ ସେ କେଉଁଠି ଥିଲା ଏବଂ ଅନ୍ୟ ଗ୍ୟାଙ୍ଗଷ୍ଟରଙ୍କ ସହ ଯୋଗାଯୋଗରେ ଥିଲା କି ନାହିଁ, ସେ ନେଇ ମଧ୍ୟ ଅଧିକ ତଥ୍ୟ ଆଦାୟ କରିବ ପୁଲିସ ।
