ଚେନ୍ନାଇ: ସାଉଥ୍ ସୁପରଷ୍ଟାର୍ ଅଜିତ କୁମାର ୟୁରୋପରେ ଏକ କାର୍ ରେସିଂ ପ୍ରତିଯୋଗିତା ସମୟରେ ଦୁର୍ଘଟଣାର ସମ୍ମୁଖୀନ ହୋଇଛନ୍ତି। ତେବେ ସୌଭାଗ୍ୟବଶତଃ ଏହି ଭୟଙ୍କର ସଡ଼କ ଦୁର୍ଘଟଣାରୁ ସେ ଅଳ୍ପକେ ବର୍ତ୍ତିଯାଇଛନ୍ତି ଏବଂ ତାଙ୍କୁ କୌଣସି ଗୁରୁତର ଆଘାତ ଲାଗିନାହିଁ।
ୟୁରୋପରେ ଅନୁଷ୍ଠିତ ଏସିଆନ୍ ଲେ ମାନ୍ସ ସିରିଜ୍ ବା ମିଚେଲିନ୍ ଲେ ମାନ୍ସ କପ୍ କାର୍ଯ୍ୟକ୍ରମରେ ଭାଗ ନେଇଥିବା ବେଳେ ଏହି ଘଟଣା ଘଟିଥିଲା। ପ୍ରତିଯୋଗିତା ସମୟରେ ନିୟନ୍ତ୍ରଣ ହରାଇ ଅଜିତଙ୍କ କାର୍ ଅନ୍ୟ ଏକ ଗାଡ଼ି ସହ ଧକ୍କା ହୋଇଥିଲା। ଚକ ଜନିତ କେତେକ ବୈଷୟିକ ସମସ୍ୟା ଯୋଗୁଁ ରେସିଂ ସମୟରେ ଅସୁବିଧା ସୃଷ୍ଟି ହୋଇଥିଲା।
ଏତେ ବଡ଼ ଧକ୍କା ସତ୍ତ୍ୱେ ଅଜିତ ସମ୍ପୂର୍ଣ୍ଣ ସୁରକ୍ଷିତ ଅଛନ୍ତି। ମୋଟରସ୍ପୋର୍ଟ ପ୍ରତି ଅଜିତଙ୍କର ଗଭୀର ଭଲପାଇବା ରହିଛି। ସେ ଅନ୍ତର୍ଜାତୀୟ ସ୍ତରରେ ଫର୍ମୁଲା ଚାମ୍ପିଅନସିପ୍ରେ ଭାଗ ନେଉଥିବା କେତେଜଣ ଭାରତୀୟ ଅଭିନେତାଙ୍କ ମଧ୍ୟରୁ ଜଣେ। ୨୦୨୫ରେ ଇଟାଲୀର GT4 ୟୁରୋପିଆନ୍ ସିରିଜ୍ ଏବଂ ସ୍ପେନ୍ର ପୋର୍ସ ସ୍ପ୍ରିଣ୍ଟ ଚ୍ୟାଲେଞ୍ଜ୍ ସମୟରେ ମଧ୍ୟ ତାଙ୍କ କାର୍ ଦୁର୍ଘଟଣାଗ୍ରସ୍ତ ହୋଇଥିଲା।
ଦୁବାଇ ୨୪ଏଚ୍ ପ୍ରାକ୍ଟିସ୍ ସେସନ୍ ସମୟରେ ମଧ୍ୟ ସେ ଅଳ୍ପକେ ବର୍ତ୍ତିଯାଇଥିଲେ। ଏକ ସାକ୍ଷାତକାରରେ ଅଜିତ କହିଥିଲେ ଯେ, ଦୁର୍ଘଟଣା ହେବା ପରେ ସେ ପ୍ରଥମେ ନିଜର ଆଘାତ ଏବଂ ଗାଡ଼ିର ସ୍ଥିତି ଯାଞ୍ଚ କରନ୍ତି, କାରଣ ତାଙ୍କର ମୁଖ୍ୟ ଲକ୍ଷ୍ୟ ଥାଏ ଯେକୌଣସି ମତେ ରେସ୍ ଶେଷ କରିବା। ଅଭିନୟ କ୍ଷେତ୍ରରେ, ସେ ଆଗାମୀ ଫିଲ୍ମ ‘ଡେୟାରଡେଭିଲ୍’ ରେ ନଜର ଆସିବେ।
