ସ୍ବାମୀଙ୍କ ପରକୀୟା ପ୍ରୀତିକୁ ବିରୋଧ କରି ଟାଓ୍ବାର ଉପରେ ଚଢ଼ିଗଲେ ସ୍ତ୍ରୀ, ଓହ୍ଲାଇବା ପରେ ଥାନାକୁ ନେଲା ପୋଲିସ
ପାଟନା: ସ୍ବାମୀ ପରକୀୟା ପ୍ରୀତିରେ ଲିପ୍ତ, ଅନ୍ୟ ମହିଳାଙ୍କ ସହ ରହୁଛନ୍ତି । ବାରମ୍ବାର ବୁଝାଇବା ପରେ ମଧ୍ୟ ସେ ନିଜ ପ୍ରବୃତ୍ତି ଛାଡ଼ିପାରୁ ନାହାନ୍ତି । ଶେଷରେ କୌଣସି ଉପାୟ ନପାଇ ଜୀବନ ହାରିବାକୁ ମୋବାଇଲ ଟାଓ୍ବାର ଉପରେ ଚଢ଼ିଗଲେ ସ୍ତ୍ରୀ । ବିହାରର ଗୋପାଳଗଞ୍ଜ ଜିଲ୍ଲା କଟେୟା ଥାନା ଅନ୍ତର୍ଗତ ଏକ ଗ୍ରାମରେ ରବିବାର ସକାଳେ ଏହି ଦୃଶ୍ୟ ଦେଖିବାକୁ ମିଳିଥିଲା। ଜଣେ ମହିଳା ପାରିବାରିକ କଳହ ଓ ମାନସିକ ଅଶାନ୍ତି ଯୋଗୁଁ ଗାଁରେ ଥିବା ଏକ ଉଚ୍ଚ ମୋବାଇଲ୍ ଟାୱାର ଉପରକୁ ଚଢ଼ି ଯାଇଥିଲେ। ଏହି ଖବର ପ୍ରସାରିତ ହେବା ମାତ୍ରେ ସ୍ଥାନୀୟ ଅଞ୍ଚଳରେ ତୀବ୍ର ଉତ୍ତେଜନା ସୃଷ୍ଟି ହୋଇଥିଲା। ଘଟଣାସ୍ଥଳରେ ଶତାଧିକ ଗ୍ରାମବାସୀଙ୍କ ଭିଡ଼ ଜମିଥିଲା। ସୂଚନା ଅନୁଯାୟୀ, ଉକ୍ତ ମହିଳାଙ୍କ ବିବାହ ୨୦୧୯ ମସିହାରେ ହୋଇଥିଲା ଏବଂ ସେ ତିନୋଟି ସନ୍ତାନର ମାଆ ।
ଅନ୍ୟ ମହିଳାଙ୍କ ସହ ରହୁଛନ୍ତି ସ୍ୱାମୀ
ମହିଳାଙ୍କ ଅଭିଯୋଗ ଅନୁସାରେ, ତାଙ୍କ ସ୍ୱାମୀଙ୍କର ଜଣେ ଅନ୍ୟ ମହିଳାଙ୍କ ସହ ସମ୍ପର୍କରହିଛି ଏବଂ ସେ ତାଙ୍କୁ ନିଜ ସହିତ ରଖୁଛନ୍ତି। ଏହି କାରଣରୁ ମହିଳାଜଣକ ଦୀର୍ଘ ଦିନ ହେବ ଗଭୀର ମାନସିକ ଚାପ ଓ ଯନ୍ତ୍ରଣା ଦେଇ ଗତି କରୁଥିଲେ। ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଚାଲିଥିବା ଏହି ବିବାଦ ଚରମ ସୀମାରେ ପହଞ୍ଚିବା ପରେ, ରବିବାର ସକାଳେ ସେ କାହାକୁ କିଛି ନକହି ସିଧା ମୋବାଇଲ୍ ଟାୱାର ଉପରକୁ ଚଢ଼ିଯାଇଥିଲେ। ସକାଳୁ ସକାଳୁ ଗ୍ରାମବାସୀମାନେ ମହିଳାଙ୍କୁ ଟାୱାର ଉପରେ ଦେଖି କଟେୟା ଥାନା ପୋଲିସକୁ ତୁରନ୍ତ ସୂଚନା ଦେଇଥିଲେ।
ବହୁ ବୁଝାସୁଝା ପରେ ଟାୱାରରୁ ଓହ୍ଲାଇଲେ ମହିଳା
ଖବର ପାଇ ପୋଲିସ ଟିମ୍ ବିଳମ୍ବ ନକରି ଘଟଣାସ୍ଥଳରେ ପହଞ୍ଚିଥିଲା ଏବଂ ମହିଳାଙ୍କୁ ସୁରକ୍ଷିତ ଭାବେ ତଳକୁ ଆଣିବା ପାଇଁ ପ୍ରୟାସ ଆରମ୍ଭ କରିଥିଲା। ଟାୱାର ତଳେ ଠିଆ ହୋଇ ପୋଲିସ ଅଧିକାରୀ ଓ ଗାଁର ଲୋକମାନେ ମହିଳାଙ୍କୁ ଦୀର୍ଘ ସମୟ ଧରି ବୁଝାଇବାକୁ ଚେଷ୍ଟା କରିଥିଲେ। ଉପସ୍ଥିତ ଲୋକଙ୍କ ନଜର ଟାୱାର ଉପରେ ଥିଲା ଏବଂ ସମସ୍ତେ ଆତଙ୍କିତ ଥିଲେ। ଶେଷରେ, ପୋଲିସର ଆଶ୍ୱାସନା ଓ ସ୍ଥାନୀୟ ଲୋକଙ୍କ ଅନୁରୋଧ ରକ୍ଷା କରି ମହିଳାଜଣକ ତଳକୁ ଓହ୍ଲାଇବା ପାଇଁ ରାଜି ହୋଇଥିଲେ। ପୋଲିସ ସତର୍କତାର ସହ ତାଙ୍କୁ ସୁରକ୍ଷିତ ଭାବେ ତଳକୁ ଆଣିବାରେ ସଫଳ ହୋଇଥିଲା।
ମହିଳା ଓ ସ୍ୱାମୀଙ୍କୁ ଥାନାକୁ ନେଲା ପୋଲିସ
ମହିଳାଜଣକ ଟାୱାରରୁ ସୁରକ୍ଷିତ ଓହ୍ଲାଇବା ପରେ ପୋଲିସ ପ୍ରଶାସନ ଏବଂ ସ୍ଥାନୀୟ ଲୋକେ ଆଶ୍ୱସ୍ତ ହୋଇଥିଲେ। ଏହାପରେ ପୋଲିସ ତୁରନ୍ତ ଉଭୟ ମହିଳା ଏବଂ ତାଙ୍କ ସ୍ୱାମୀଙ୍କୁ ଥାନାକୁ ନେଇଛି। ଥାନାରେ ଦୁହିଁଙ୍କୁ ସାମ୍ନାସାମ୍ନି ବସାଇ ଏହି ପାରିବାରିକ ବିବାଦ ସମ୍ପର୍କରେ ପଚରାଉଚରା କରାଯାଉଛି। ପୋଲିସ ପକ୍ଷରୁ କୁହାଯାଇଛି ଯେ, ସମ୍ପୂର୍ଣ୍ଣ ମାମଲାର ବିଧିବଦ୍ଧ ତଦନ୍ତ କରାଯାଉଛି ଏବଂ ଯାଞ୍ଚ ରିପୋର୍ଟ ଆଧାରରେ ଆଗକୁ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
