ନୂଆଦିଲ୍ଲୀ: ପାର୍ଟି ମୁଖ୍ୟାଳୟରେ ସ୍ୱାଧୀନତା ଦିବସ ପାଳନ ଅବସରରେ ଜାତୀୟ ଗୀତ ବନ୍ଦେ ମାତରମ ଗାନ କାଳରେ କଂଗ୍ରେସ ସଂସଦୀୟ ଦଳର ଅଧ୍ୟକ୍ଷା ସୋନିଆ ଗାନ୍ଧିଙ୍କ ହାବଭାବ, ମୁହଁର ଭାବ ଓ ଅସ୍ପଷ୍ଟ ଶବ୍ଦ ଆଦାନ ପ୍ରଦାନ ଏବେ ଏକ ବଡ଼ ବିବାଦ ଛିଡା କରିଛି। ଏହାକୁ ନେଇ ସାରା ଦେଶର ବିଭିନ୍ନ ଥାନାରେ ଲୋକେ ଏବେ ଏତଲା ରୁଜୁ କରାଉଛନ୍ତି। ଏହି କ୍ରମରେ ଜାତୀୟ ରାଜଧାନୀ ଦିଲ୍ଲୀରେ ରୁଜୁ ଏକ ଏଫଆଇଆରରେ ସୋନିଆ ଗାନ୍ଧି ଓ ରାହୁଲ ଗାନ୍ଧିଙ୍କ ବିରୋଧରେ ଏଫଆଇଆର ରୁଜୁ କରିବା ଓ ଏହାର ତଦନ୍ତ କରିବାକୁ ଦାବି କରାଯାଇଛି।
ଏହି ମାମଲାରେ ବନ୍ଦେ ମାତରମ ସଙ୍ଗୀତର ଲେଖକ ବଙ୍କିମ ଚନ୍ଦ୍ର ଚଟ୍ଟୋପଧ୍ୟାୟଙ୍କ ବଂଶଜ ସୁମିତ୍ରୋ ଚାଟାର୍ଜୀ ସୋନିଆ ଗାନ୍ଧିଙ୍କୁ ପତ୍ର ଲେଖି ନିସର୍ତ୍ତ କ୍ଷମା ଯାଚନା କରିବାକୁ ଦାବି କରିଛନ୍ତି। ଏହି ବିବାଦ ବନ୍ଦେ ମାତରମକୁ ଅପାରଧିକ ସଂରକ୍ଷଣ ପ୍ରଦାନ କରୁଥିବା ଆଇନ ଗୃହୀତ ହେବାର କିଛିଦିନ ପରେ ସାମ୍ନାକୁ ଆସିଛି। ଏଣୁ ବିବାଦର ସମୟ ଏବେ ବିଶେଷ ରୂପେ ଗୁରୁତ୍ୱପୂର୍ଣ୍ଣ ହୋଇପଡିଛି।
ନୂଆଦିଲ୍ଲୀରେ ଅଖିଳ ଭାରତୀୟ କଂଗ୍ରେସ କମିଟି (ଏଆଇସିସି) ମୁଖ୍ୟାଳୟରେ ସ୍ୱାଧୀନତା ଦିବସ ପାଳନ କାଳରେ ବନ୍ଦେ ମାତରମ ସଂଗୀତର ସମ୍ପୂର୍ଣ୍ଣ ଗାୟନ ହେଉଥିଲା। ସେତେବେଳେ ବରିଷ୍ଠ କଂଗ୍ରେସ ନେତ୍ରୀ ସୋନିଆ ଗାନ୍ଧିଙ୍କୁ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେଙ୍କ ସହ କଥା ହେଉଥିବା ଓ ଇସାରା କରୁଥିବା ଦେଖା ଯାଇଛନ୍ତି। ଏହି ସମୟରେ ସେଠାରେ ରାହୁଲ ଗାନ୍ଧି ମଧ୍ୟ ଥିଲେ। ବିଜେପି ନେତାମାନେ ଅଭିଯୋଗ କରୁଛନ୍ତି ଯେ ସୋନିଆ ଗାନ୍ଧି ଜାତୀୟ ଗୀତର ସମ୍ପୂର୍ଣ୍ଣ ଗାନକୁ ଆପତ୍ତି କରୁଥିଲେ ଓ ସେ ଗୀତକୁ ଅଟକାଇବାକୁ ଚାହୁଁଥିଲେ।
ତେବେ କଂଗ୍ରେସ ଏପରି ବ୍ୟାଖ୍ୟାକୁ ଅଗ୍ରାହ୍ୟ କରିଦେଇଛି। କଂଗ୍ରେସ ସାଂସଦ ଜୟରାମ ରମେଶ କହିଛନ୍ତି ଯେ ଜାତୀୟ ଗୀତ ସମ୍ପୂର୍ଣ୍ଣ ଗାୟନ ହୋଇଥିଲା ଓ ଏଥିରେ କୌଣସି ବିବାଦ ନଥିଲା। ପାର୍ଟି ଦାବି କରିଛି ଯେ ସୋନିଆ ଖଡଗେଙ୍କ ଲାଗି ଚୌକି ମଗାଉଥିଲେ, ଯିଏ କାର୍ଯ୍ୟକ୍ରମ କାଳରେ ବହୁ ସମୟ ଧରି ଛିଡା ହୋଇ ରହିଥିଲେ। ତେବେ ବିଜେପି ସୋନିଆ ଗାନ୍ଧି ଓ କଂଗ୍ରେସ ନେତୃତ୍ୱ ଉପରେ ଜାତୀୟ ଗୀତର ଅପମାନ କରିଥିବା ଅଭିଯୋଗ କରୁଛି। ଏଥିରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଅଭିଯୋଗ କରିଛନ୍ତି ଯେ ଏହି ଘଟଣା କଂଗ୍ରେସ ପାର୍ଟିର ଭୋଟ ବ୍ୟାଙ୍କ ରାଜନୀତି ପରିଣାମ ଅଟେ। ଦିଲ୍ଲୀ ପୋଲିସରେ ରୁଜୁ ଅଭିଯୋଗରେ କଂଗ୍ରେସ ମୁଖ୍ୟାଳୟରେ ହୋଇଥିବା ଘଟଣାକୁ ନେଇ ସୋନିଆ ଗାନ୍ଧି ଓ ରାହୁଲ ଗାନ୍ଧିଙ୍କ ବିରୋଧରେ ଏଫଆଇଆର ରୁଜୁ କରିବାକୁ ଓ ବନ୍ଦେ ମାତରମ ଗାନ କାଳରେ ଉପୁଜିଥିବା ବାଧାର ଯାଞ୍ଚ କରିବାକୁ ଦାବି କରାଯାଇଛି।
