ଭୁବନେଶ୍ୱର: ଓଡ଼ିଶା ପୋଲିସର ଏକ ଟିମ୍ ଉପରେ ମଧ୍ୟପ୍ରଦେଶରେ ସଶସ୍ତ୍ର ଅପରାଧୀଙ୍କ ଆକ୍ରମଣ ଘଟଣାକୁ ନେଇ ଚାଞ୍ଚଲ୍ୟ ସୃଷ୍ଟି ହୋଇଛି। ଆକ୍ରମଣ କରି ଅପରାଧୀମାନେ ପୋଲିସ ହେପାଜତରେ ଥିବା ଜଣେ ଡ୍ରଗ୍ସ ଚୋରାଚାଲାଣ ଅଭିଯୁକ୍ତଙ୍କୁ ଛଡ଼ାଇ ନେଇଥିବା ଜଣାପଡ଼ିଛି। ଘଟଣା ପରେ ଅଭିଯୁକ୍ତଙ୍କ ଗତିବିଧି ସମ୍ପର୍କିତ ସୂଚନା କେଉଁଠୁ ଲିକ୍ ହେଲା, ତାହା ନେଇ ଓଡ଼ିଶା ପୋଲିସ ତଦନ୍ତ ଆରମ୍ଭ କରିଛି।
ସୂଚନା ଅନୁସାରେ, କନ୍ଧମାଳ ପୋଲିସର ଜଣେ ସବ୍-ଇନ୍ସପେକ୍ଟର ଏବଂ ୬ ଜଣ ସଶସ୍ତ୍ର କନଷ୍ଟେବଲ୍ ମିଶି ୨୮ ବର୍ଷୀୟ ଡ୍ରଗ୍ସ ଚୋରାଚାଲାଣ ଅଭିଯୁକ୍ତ ଆଦିତ୍ୟ ମିଶ୍ର ଓରଫ ରାକେଶ ଓରଫ ସାୱରିୟାଙ୍କୁ ଓଡ଼ିଶାରୁ ମଧ୍ୟପ୍ରଦେଶର ରିୱା ନେଉଥିଲେ। ସେଠାକାର ଏକ ସ୍ଥାନୀୟ କୋର୍ଟରେ ତାଙ୍କୁ ହାଜର କରିବା ପାଇଁ ନିଆଯାଉଥିଲା।
ତେବେ ସିଧି ଜିଲ୍ଲାର ଛୁହିଆ ଘାଟି ନିକଟରେ ପୋଲିସ ଟିମ୍କୁ ସଶସ୍ତ୍ର ଅପରାଧୀମାନେ ଆକ୍ରମଣ କରିଥିଲେ। ଆକ୍ରମଣ ପରେ ପୋଲିସ ହେପାଜତରେ ଥିବା ଆଦିତ୍ୟ ମିଶ୍ରଙ୍କୁ ଅପରାଧୀମାନେ ଛଡ଼ାଇ ନେଇଥିବା ରିପୋର୍ଟରେ କୁହାଯାଇଛି। ଏହି ଘଟଣାରେ ଜଣେ କନଷ୍ଟେବଲ୍ ଆହତ ହୋଇଥିବା ବେଳେ ତାଙ୍କ ସ୍ଥିତି ସ୍ଥିର ଥିବା ଜଣାପଡ଼ିଛି।
ଏହି ଘଟଣା ପରେ ଓଡ଼ିଶା ପୋଲିସର ଏକ ଟିମ୍ ମଧ୍ୟପ୍ରଦେଶ ଯାଇ ଘଟଣା ସମ୍ପର୍କରେ ତଥ୍ୟ ସଂଗ୍ରହ କରୁଛି। ମଧ୍ୟପ୍ରଦେଶ ପୋଲିସ ଆକ୍ରମଣ ଏବଂ ଅଭିଯୁକ୍ତଙ୍କ ଫେରାର ଘଟଣାର ତଦନ୍ତ କରୁଥିବା ବେଳେ, ଓଡ଼ିଶା ପୋଲିସ ଆଦିତ୍ୟଙ୍କ ଗତିବିଧି ସମ୍ପର୍କିତ ସୂଚନା ଲିକ୍ ହୋଇଥିବା ସନ୍ଦେହର ତଦନ୍ତ କରୁଛି।
ପୋଲିସର ସୂଚନା ଅନୁସାରେ, ଅଭିଯୁକ୍ତଙ୍କୁ କୋର୍ଟରେ ହାଜର କରିବା ନେଇ ରିୱା ପୋଲିସକୁ ପୂର୍ବରୁ ଜଣାଇ ଦିଆଯାଇଥିଲା। ତେବେ ମଧ୍ୟପ୍ରଦେଶରେ ଅଭିଯୁକ୍ତଙ୍କୁ ନେବା ସମୟରେ କେବଳ ଓଡ଼ିଶା ପୋଲିସର କର୍ମଚାରୀମାନେ ହିଁ ତାଙ୍କ ସହ ଥିଲେ।
also read – ରାଜଧାନୀରୁ ବିଦା ହେବେ ଚେନ୍ ଲୁଟେରା, ୨୦୨୪ରୁ ୨୦୨୬ ମଧ୍ୟରେ ଚିନ୍ତାଜନକ ଚିତ୍ର
ଆଦିତ୍ୟ ମିଶ୍ରଙ୍କୁ କନ୍ଧମାଳ ପୋଲିସ ଜୁନ୍ ୩୦ରେ ରିୱା ଜିଲ୍ଲାରୁ ଗିରଫ କରିଥିଲା। ଏହା ପୂର୍ବରୁ ଜୁନ୍ ୨ରେ ଗୋଛାପଡ଼ା ଅଞ୍ଚଳରୁ ପୋଲିସ ପ୍ରାୟ ୧,୪୭୦ କିଲୋଗ୍ରାମ ଗଞ୍ଜେଇ ଭର୍ତ୍ତି ଏକ ଟ୍ରକ୍ ଜବତ କରିଥିଲା। ଜବତ ଗଞ୍ଜେଇର ଆନୁମାନିକ ମୂଲ୍ୟ ପ୍ରାୟ ୧.୫ କୋଟି ଟଙ୍କା ବୋଲି କୁହାଯାଇଛି। ଏହି ମାମଲାରେ ଟ୍ରକ୍ ଚାଳକ ଯୋଗେଶ ମୀନାଙ୍କୁ ଗିରଫ କରାଯାଇଥିଲା ଏବଂ ତାଙ୍କ ଠାରୁ ମିଳିଥିବା ସୂଚନା ଆଧାରରେ ରିୱାରେ ଚଢ଼ାଉ କରି ଆଦିତ୍ୟଙ୍କୁ ଗିରଫ କରାଯାଇଥିଲା।
ଏବେ ପୋଲିସ ପାଇଁ ବଡ଼ ପ୍ରଶ୍ନ ହେଉଛି ଅଭିଯୁକ୍ତଙ୍କୁ କେଉଁ ରାସ୍ତାରେ ଏବଂ କେବେ ନିଆଯାଉଛି, ସେ ସମ୍ପର୍କରେ ଅପରାଧୀମାନେ କିପରି ଆଗୁଆ ସୂଚନା ପାଇଲେ। ଏହି ତଥ୍ୟ କେଉଁଠୁ ଲିକ୍ ହୋଇଥିଲା, ତାହା ଜାଣିବା ପାଇଁ ତଦନ୍ତ ଜାରି ରହିଛି।
