ପିଏମ ମୋଦୀଙ୍କ ଅଷ୍ଟ୍ରେଲିଆ ଗସ୍ତ ଅବସରରେ ୨୦ଟି ପ୍ରସଙ୍ଗରେ ବୁଝାମଣା, ପ୍ରତିରକ୍ଷା ଏବଂ ସୁରକ୍ଷା କ୍ଷେତ୍ରରେ ଭାରତ ସହ ବଡ଼ ଚୁକ୍ତି

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଷ୍ଟ୍ରେଲିଆ ଗସ୍ତ ଅବସରରେ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ପ୍ରତିରକ୍ଷା ଓ ସୁରକ୍ଷା ଦିଗରେ ଏକ ଗୁରୁତ୍ବପୂର୍ଣ୍ଣ ଚୁକ୍ତି ସ୍ବାକ୍ଷରିତ ହୋଇଛି। ଦୁଇ ଦେଶ ନିଜର ପ୍ରତିରକ୍ଷା ଭାଗିଦାରୀକୁ ଏକ ନୂତନ ସ୍ତରକୁ ନେବା ପାଇଁ “ପ୍ରତିରକ୍ଷା ଏବଂ ସୁରକ୍ଷା ସହଯୋଗ ୨୦୨୬” (Defence and Security Cooperation 2026) ଉପରେ ମିଳିତ ଚୁକ୍ତିନାମା ଜାରି କରିଛନ୍ତି।

ଏହି ମିଳିତ ଚୁକ୍ତିନାମାରେ ସମୁଦାୟ ୨୦ଟି ପ୍ରସଙ୍ଗ ଉପରେ ସହମତି ପ୍ରକାଶ ପାଇଛି। ଯେଉଁଥିରେ ପରସ୍ପରର ସାମରିକ ବିମାନ ମୁତୟନ ବୃଦ୍ଧି କରିବା ଏବଂ ଭାରତ- ପ୍ରଶାନ୍ତ ମହାସାଗରୀୟ କ୍ଷେତ୍ରରେ ଶାନ୍ତି ଓ ସାମୁଦ୍ରିକ ସୁରକ୍ଷା ବଜାୟ ରଖିବା ଉପରେ ବିଶେଷ ଗୁରୁତ୍ୱ ଦିଆଯାଇଛି।

ଏହି ପ୍ରତିରକ୍ଷା ଚୁକ୍ତିର ମୁଖ୍ୟ ପ୍ରସଙ୍ଗ:

ସାମରିକ ବିମାନ ମୁତୟନ ବୃଦ୍ଧି: ଭାରତ ଏବଂ ଅଷ୍ଟ୍ରେଲିଆ ଏଣିକି ପରସ୍ପରର ସାମରିକ ଅଞ୍ଚଳରେ ନିଜ ନିଜର ସୈନ୍ୟ ବିମାନ ମୁତୟନ ବୃଦ୍ଧି କରିବେ।

ମିଳିତ ସମରାଭ୍ୟାସ: ଦୁଇ ଦେଶର ସେନା ମଧ୍ୟରେ ମିଳିତ ସାମରିକ ଅଭ୍ୟାସର ସଂଖ୍ୟା ବୃଦ୍ଧି କରାଯିବ, ଯାହାଦ୍ୱାରା ପରସ୍ପର ମଧ୍ୟରେ ସୂଚନା ଆଦାନପ୍ରଦାନ ଅଧିକ ସହଜ ହେବ।

ନିୟମିତ ମନ୍ତ୍ରୀସ୍ତରୀୟ ବୈଠକ: ଦୁଇ ଦେଶର ରଣନୀତିକ ସମ୍ପର୍କକୁ ଅଧିକ ସୁଦୃଢ଼ କରିବା ପାଇଁ ପ୍ରତିରକ୍ଷା ମନ୍ତ୍ରୀ ସ୍ତରରେ ନିୟମିତ ଆଲୋଚନା ଏବଂ ବୈଠକ ଅନୁଷ୍ଠିତ ହେବ।

ଆତଙ୍କବାଦ ଏବଂ ମାନବ ଚୋରା ଚାଲାଣ ବିରୋଧରେ ଲଢ଼େଇ: ଆତଙ୍କବାଦୀ ପାଣ୍ଠି, ସାଇବର ସୁରକ୍ଷା, ମାନବ ଚାଲାଣ ଏବଂ ସାମୁଦ୍ରିକ ଅପରାଧ ରୋକିବା ପାଇଁ ଉଭୟ ଦେଶ ଗୁପ୍ତଚର ସୂଚନା ସହଭାଗୀ କରିବେ।

Also Read: ଇରାନରେ ଆମେରିକାର ମନଇଚ୍ଛା ଆକ୍ରମଣ, ଅଧା ସହର ଜଳୁଛି…ଏବେ ପରମାଣୁ ବୋମା ଫିଙ୍ଗିବ ତେହେରାନ୍ !

ବହୁପାକ୍ଷିକ ସହଯୋଗ: ମୁକ୍ତ ଏବଂ ସୁରକ୍ଷିତ ଭାରତ- ପ୍ରଶାନ୍ତ କ୍ଷେତ୍ର ପାଇଁ ଆମେରିକା (US) ଏବଂ ଜାପାନ ସହିତ ତ୍ରିପାକ୍ଷିକ ଓ ବହୁପାକ୍ଷିକ ସହଯୋଗ ବୃଦ୍ଧି କରିବାକୁ ଚୁକ୍ତି ହୋଇଛି।

ଏହା ବ୍ୟତୀତ ବିପର୍ଯ୍ୟୟ ପରିଚାଳନା, ମାନବୀୟ ସହାୟତା ଏବଂ ଗୁରୁତ୍ୱପୂର୍ଣ୍ଣ ସାମଗ୍ରୀର ସପ୍ଲାଇ ଚେନ୍କୁ ସୁଦୃଢ଼ କରିବା ପାଇଁ ମଧ୍ୟ ଦୁଇ ଦେଶ ମଧ୍ୟରେ ସହମତି ପ୍ରକାଶ ପାଇଛି। ଏହି ଚୁକ୍ତିନାମା ଭାରତ ଏବଂ ଅଷ୍ଟ୍ରେଲିଆର ‘Comprehensive Strategic Partnership’ (CSP)କୁ ଆହୁରି ମଜବୁତ କରିବ ବୋଲି ଆଶା କରାଯାଉଛି।