ଅପହରଣକାରୀଙ୍କୁ ଦିଆସରିଛି ୪୪ କୋଟି ଟଙ୍କା, ହେଲେ ଘରକୁ ଫେରିନାହାନ୍ତି ଅପହୃତ ଭାରତୀୟ ହୀରା ବ୍ୟବସାୟୀ !
ସୁରଟ: ମାଲିରେ ଅପହୃତ ହୋଇଥିବା ୭୫ ବର୍ଷୀୟ ଭାରତୀୟ ବଂଶୋଦ୍ଭବ ହୀରା ବ୍ୟବସାୟୀ ଧୀରୁ ରାମାଣୀ ଶେଷରେ ମୁକ୍ତ ହୋଇଛନ୍ତି। ରିପୋର୍ଟ ଅନୁଯାୟୀ, ତାଙ୍କୁ ସୁରକ୍ଷିତ ଉଦ୍ଧାର କରିବା ପାଇଁ ଆମେରିକାରେ ରହୁଥିବା ତାଙ୍କ ପରିବାର ପ୍ରାୟ ୪ ମିଲିୟନ୍ ୟୁରୋ (ପ୍ରାୟ ୪୪ କୋଟି ଟଙ୍କା) ଦେଇଛନ୍ତି।
ଗୁଜରାଟର ଅମରେଲି ଜିଲ୍ଲାର ମୂଳ ବାସିନ୍ଦା ତଥା ହୀରା ବ୍ୟବସାୟୀ ଧୀରୁ ରାମାଣୀ ନିକଟରେ ପଶ୍ଚିମ ଆଫ୍ରିକୀୟ ଦେଶ ମାଲିରେ ଏକ ସୁନା ଖଣି ଅଧିଗ୍ରହଣ କରି ସେଠାରେ ରହୁଥିଲେ। ଗତ ଏପ୍ରିଲ ମାସରେ ସନ୍ଦିଗ୍ଧ ଆତଙ୍କବାଦୀ କିମ୍ବା ଅପରାଧୀମାନେ ତାଙ୍କୁ ଅପହରଣ କରିନେଇଥିଲେ। ଅପହରଣକାରୀମାନେ ପ୍ରାରମ୍ଭିକ ପର୍ଯ୍ୟାୟରେ ତାଙ୍କୁ ଛାଡ଼ିବା ପାଇଁ ୧୦୦ କୋଟି ଟଙ୍କା ଦାବି କରିଥିଲେ।
ଆମେରିକାରେ ରହୁଥିବା ରାମାଣୀଙ୍କ ପରିବାର ଲୋକେ ଅପହରଣକାରୀଙ୍କ ସହ ନିଜ ସ୍ତରରେ ବୁଝାମଣା ଓ ଆଲୋଚନା କରି ୪ ମିଲିୟନ୍ ୟୁରୋ (୪୪ କୋଟି ଟଙ୍କା) ଦେବାକୁ ସ୍ଥିର କରିଥିଲେ। ଏହି ସମ୍ପୂର୍ଣ୍ଣ ଆଲୋଚନା ପ୍ରକ୍ରିୟା ପରିବାର ପକ୍ଷରୁ କରାଯାଇଥିଲା। ଏଥିରେ କୌଣସି ଭାରତୀୟ ସରକାରୀ ସଂସ୍ଥା କିମ୍ବା ଏଜେନ୍ସି ସାମିଲ ନଥିବା ସୂତ୍ରରୁ ଜଣାପଡ଼ିଛି।
ଟଙ୍କା ଦିଆଯିବା ପରେ ରାମାଣୀ ଅପହରଣକାରୀଙ୍କ କବଳରୁ ମୁକ୍ତ ହୋଇଛନ୍ତି ସତ, ମାତ୍ର ସେ ଏପର୍ଯ୍ୟନ୍ତ ମାଲିରୁ ଭାରତ କିମ୍ବା ଆମେରିକା ଫେରିନାହାନ୍ତି।
ଗୁଜରାଟର ଅମରେଲି ଜିଲ୍ଲା ଅନ୍ତର୍ଗତ ଧାର୍ ଗ୍ରାମର ମୂଳ ବାସିନ୍ଦା ରାମାଣୀ। ସେ ୧୯୮୦ ଦଶକରୁ ସୁରଟର ପ୍ରସିଦ୍ଧ ହୀରା ବ୍ୟବସାୟ ସହ ଜଡ଼ିତ ଥିଲେ। ପରବର୍ତ୍ତୀ ସମୟରେ ସେ ଆମେରିକା ଚାଲି ଯାଇଥିଲେ, ଯେଉଁଠାରେ ତାଙ୍କ ପରିବାର ଅନ୍ତର୍ଜାତୀୟ ସ୍ତରରେ ହୀରା କାରବାର ସହ ସଂପୃକ୍ତ। ଏପ୍ରିଲ ମାସରେ ଏହି ଅପହରଣ ଘଟଣା ଘଟିବା ସମୟରେ, ମାଲିର ରାଜଧାନୀ ବାମାକୋ (Bamako)ରେ ଥିବା ଭାରତୀୟ ଦୂତାବାସ ସେଠାରେ ରହୁଥିବା ଭାରତୀୟ ନାଗରିକଙ୍କ ପାଇଁ ଏକ ସାଧାରଣ ସୁରକ୍ଷା ପରାମର୍ଶ ଜାରି କରିଥିଲା।
ମାଲିର ‘କାଟି’ (Kati) ଓ ଅନ୍ୟାନ୍ୟ ଅଞ୍ଚଳରେ ବୃଦ୍ଧି ପାଉଥିବା ସୁରକ୍ଷା ସଙ୍କଟ ଏବଂ ସମ୍ଭାବ୍ୟ ଆକ୍ରମଣକୁ ଦୃଷ୍ଟିରେ ରଖି ସମସ୍ତ ଭାରତୀୟଙ୍କୁ ସତର୍କ ରହିବାକୁ, ଘର ଭିତରେ ରହିବାକୁ ଏବଂ ସ୍ଥାନୀୟ ପ୍ରଶାସନର ନିୟମ ପାଳନ କରିବାକୁ କୁହାଯାଇଥିଲା। ଗତ ଏପ୍ରିଲ ୨୫ ରେ ଜାରି ହୋଇଥିବା ଏହି ଆଡଭାଇଜରୀରେ କୌଣସି ନିର୍ଦ୍ଦିଷ୍ଟ ବ୍ୟକ୍ତି କିମ୍ବା ଧୀରୁ ରାମାଣୀଙ୍କ ଅପହରଣ ପ୍ରସଙ୍ଗର ସିଧାସଳଖ ଉଲ୍ଲେଖ କରାଯାଇ ନଥିଲା।
