ସରକାରୀ ମଦ ବିକ୍ରୟ ସଂସ୍ଥାରେ କାର୍ଯ୍ୟରତ କର୍ମଚାରୀଙ୍କ ଦରମା ୨୫% ବୃଦ୍ଧି: ୨୦ ବର୍ଷ ପରେ ବଢିଲା ଦରମା
ଚେନ୍ନାଇ: ତାମିଲନାଡୁର ମୁଖ୍ୟମନ୍ତ୍ରୀ ଜୋସେଫ ବିଜୟଙ୍କ ସରକାର ରାଜ୍ୟ ସରକାରୀ ମଦ ବିକ୍ରୟ ସଂସ୍ଥା TASMAC (Tamil Nadu State Marketing Corporation) ରେ କାର୍ଯ୍ୟରତ କର୍ମଚାରୀଙ୍କ ଦରମାକୁ ୨୫ ପ୍ରତିଶତ ବୃଦ୍ଧି କରିଛନ୍ତି। ଗତ ୨୦ ବର୍ଷ ମଧ୍ୟରେ ଏହା ପ୍ରଥମ ବଡ଼ ବେତନ ସଂଶୋଧନ ବୋଲି ସରକାର କହିଛନ୍ତି।
ସରକାରଙ୍କ କହିବା ଅନୁସାରେ, ଏହି ନିଷ୍ପତ୍ତିର ମୁଖ୍ୟ ଉଦ୍ଦେଶ୍ୟ ହେଉଛି TASMAC ଦୋକାନରେ ଦୁର୍ନୀତିକୁ ରୋକିବା ଏବଂ ଗ୍ରାହକଙ୍କଠାରୁ ମଦ ବୋତଲ ପିଛା ଅତିରିକ୍ତ ୧୦ ଟଙ୍କା ଆଦାୟ କରାଯାଉଥିବା ଅଭିଯୋଗକୁ ବନ୍ଦ କରିବା। ଦୀର୍ଘ ଦିନ ଧରି ଗ୍ରାହକମାନେ ନିର୍ଦ୍ଧାରିତ ମୂଲ୍ୟଠାରୁ ଅଧିକ ଟଙ୍କା ନେଉଥିବା ନେଇ ଅଭିଯୋଗ କରୁଥିଲେ। ତେଣୁ ଏହାର ସମାଧାନ ପାଇଁ ବିଜୟ ସରକାର ଏହି ନିଷ୍ପତ୍ତି ନେଇଛନ୍ତି।
ଏନେଇ ରାଜ୍ୟର ଆବକାରୀ ମନ୍ତ୍ରୀ ବିଗ୍ନେଶ କହିଛନ୍ତି, କର୍ମଚାରୀଙ୍କ ବେତନ ବୃଦ୍ଧି ହେଲେ ସେମାନେ ଗ୍ରାହକଙ୍କଠାରୁ ଅତିରିକ୍ତ ଅର୍ଥ ଆଦାୟ କରିବାର ପ୍ରବୃତ୍ତିରୁ ଦୂରେଇ ରହିବେ। ଏହା ଦ୍ୱାରା ଦୁର୍ନୀତି କମିବା ସହ TASMAC ଦୋକାନଗୁଡ଼ିକରେ ସ୍ୱଚ୍ଛତା ଓ ଜବାବଦେହିତା ବଢ଼ିବ ବୋଲି ସରକାର ଆଶା କରୁଛନ୍ତି। ସେ ଆହୁରି କହିଛନ୍ତି ଯେ, TASMAC କର୍ମଚାରୀଙ୍କ ବେତନରେ ଗତ ୨୦ ବର୍ଷ ଧରି କୌଣସି ବଡ଼ ଧରଣର ସଂଶୋଧନ ହୋଇନଥିଲା। ନୂଆ ବେତନ ବ୍ୟବସ୍ଥା କର୍ମଚାରୀଙ୍କ କଲ୍ୟାଣ ସୁନିଶ୍ଚିତ କରିବା ସହ ଦୀର୍ଘ ଦିନର ଅଭିଯୋଗର ସମାଧାନ କରିବ ବୋଲି ସେ କହିଛନ୍ତି। ଏହି ବେତନ ବୃଦ୍ଧି କେବେଠାରୁ ଲାଗୁ ହେବ, ସେ ନେଇ ବିସ୍ତୃତ ସୂଚନା ଏପର୍ଯ୍ୟନ୍ତ ପ୍ରକାଶ ପାଇ ନାହିଁ।
Also Read- ଭାରତର ଏହି ୫ ରାଜ୍ୟ କରୁଛନ୍ତି କମାଲ: ମୁଣ୍ଡପିଛା ଆୟରେ ଜାତୀୟ ହାରକୁ ଟପିଲେ
ଏହି ଘୋଷଣା ପୂର୍ବରୁ ମୁଖ୍ୟମନ୍ତ୍ରୀ ଜୋସେଫ ବିଜୟ ମନ୍ଦିର, ମସଜିଦ, ଚର୍ଚ୍ଚ ଭଳି ଉପାସନା ସ୍ଥଳ, ଶିକ୍ଷାନୁଷ୍ଠାନ ଏବଂ ବସ୍ଷ୍ଟାଣ୍ଡର ୫୦୦ ମିଟର ମଧ୍ୟରେ ଥିବା ୭୧୭ଟି TASMAC ମଦ ଦୋକାନ ବନ୍ଦ କରିବାକୁ ନିର୍ଦ୍ଦେଶ ଦେଇଥିଲେ। ସରକାରଙ୍କ ସୂଚନା ଅନୁସାରେ, ତାମିଲନାଡୁରେ ମୋଟ ୪,୭୬୫ଟି TASMAC ଦୋକାନ ରହିଛି। ସେଥିମଧ୍ୟରୁ ୨୭୬ଟି ଉପାସନା ସ୍ଥଳ ନିକଟରେ, ୧୮୬ଟି ଶିକ୍ଷାନୁଷ୍ଠାନ ପାଖରେ ଏବଂ ୨୫୫ଟି ବସ୍ଷ୍ଟାଣ୍ଡ ନିକଟରେ ଥିବାରୁ ସେଗୁଡ଼ିକୁ ବନ୍ଦ କରାଯାଉଛି।
ସରକାର ଏହାକୁ ଏକ ସାମାଜିକ ସଂସ୍କାର ପଦକ୍ଷେପ ବୋଲି ବର୍ଣ୍ଣନା କରିଛନ୍ତି। ଏହି ନିଷ୍ପତ୍ତିକୁ ବିଭିନ୍ନ ରାଜନୈତିକ ଦଳ ମଧ୍ୟ ସ୍ୱାଗତ କରିଛନ୍ତି। ଅଭିନେତା ଓ ରାଜନେତା କମଲ ହାସନ ଅଧିକ ମଦ ଦୋକାନ ବନ୍ଦ କରିବାକୁ ସରକାରଙ୍କୁ ଆହ୍ୱାନ କରିଥିବା ବେଳେ, କଂଗ୍ରେସ ସାଂସଦ ମାଣିକମ ଠାକୁର ଏହାକୁ ଦୀର୍ଘ ଦିନର ଜନଦାବିର ପୂରଣ ବୋଲି କହିଛନ୍ତି। ସେ କହିଛନ୍ତି, ଏହି ପଦକ୍ଷେପ ମହିଳା, ଛାତ୍ରଛାତ୍ରୀ ଏବଂ ସାଧାରଣ ଲୋକଙ୍କ ସୁରକ୍ଷାକୁ ଆହୁରି ସୁଦୃଢ଼ କରିବ।
