ରଥଯାତ୍ରା ପାଇଁ ପୁରୀରେ କଡ଼ା ଟ୍ରାଫିକ୍ ବ୍ୟବସ୍ଥା: ୩୦ଟି ସ୍ଥାନରେ ପାର୍କିଂ, ସୁରକ୍ଷା ପାଇଁ ରହିବ ଡ୍ରୋନ୍ ଓ AI ନଜର

ପୁରୀ: ଶ୍ରୀମନ୍ଦିରରେ ମହାପ୍ରଭୁଙ୍କ ଶୃଙ୍ଖଳିତ ଦର୍ଶନ ଏବଂ ସହରର ଟ୍ରାଫିକ ସୁନିୟନ୍ତ୍ରିତ କରିବା ପାଇଁ ପୋଲିସ ଓ ପରିବହନ ବିଭାଗ ପକ୍ଷରୁ ବ୍ୟାପକ ସୁରକ୍ଷା ବଳୟ ଓ ଟ୍ରାଫିକ୍ ନିୟମାବଳୀ ଜାରି କରାଯାଇଛି। ପରିବହନ କମିଶନର ଅମିତାଭ ଠାକୁରଙ୍କ ସୂଚନା ଅନୁଯାୟୀ, ଚଳିତ ବର୍ଷ ଶ୍ରଦ୍ଧାଳୁଙ୍କ ସୁବିଧା ପାଇଁ ପୂର୍ବ ଅପେକ୍ଷା ଅଧିକ ଅତ୍ୟାଧୁନିକ ବ୍ୟବସ୍ଥା ଗ୍ରହଣ କରାଯାଇଛି।

୩୦ଟି ସ୍ଥାନରେ ସ୍ୱତନ୍ତ୍ର ପାର୍କିଂ ବ୍ୟବସ୍ଥା; ଯୋଡ଼ି ହେଲା ୬ଟି ନୂଆ ସ୍ଥାନ

ଚଳିତ ବର୍ଷ ଯାନବାହନ ଭିଡ଼କୁ ଏଡ଼ାଇବା ପାଇଁ ମୋଟ ୩୦ଟି ପାର୍କିଂ ସ୍ଥାନ ପ୍ରସ୍ତୁତ କରାଯାଇଛି। ଗତ ବର୍ଷ (୨୦୨୫) ତୁଳନାରେ ଏଥର ସୁରକ୍ଷା ବଳୟରେ ଆଉ ୬ଟି ନୂତନ ପାର୍କିଂ ସ୍ଥାନ (ଭୁଦାନ, କେନ୍ଦ୍ରୀୟ ବିଦ୍ୟାଳୟ, କେନ୍ଦ୍ରୀୟ ବିଦ୍ୟାଳୟ ପଛ ପାର୍ଶ୍ୱ, ତାଜ, ସମଙ୍ଗା, ଓ ଶ୍ରୀ ସେତୁ) ସାମିଲ କରାଯାଇଛି।

ଚାରି ଚକିଆ ଯାନ ପାଇଁ ସ୍ୱତନ୍ତ୍ର ଜୋନ୍

ମୋଟ ୨୨ଟି ପାର୍କିଂ ସ୍ଥାନ ପ୍ରସ୍ତୁତ ହୋଇଛି, ଯାହାର ସାମଗ୍ରିକ କ୍ଷମତା ୭,୭୩୦ ରହିଛି। ଏଥିମଧ୍ୟରୁ ୧୮ଟି ସାଧାରଣ ବର୍ଗ ପାଇଁ ହୋଇଥିବା ବେଳେ ୪ଟି ସ୍ଥାନ ପାସ୍ ଧାରକଙ୍କ ପାଇଁ ସଂରକ୍ଷିତ। ପାସ୍ ଧାରକଙ୍କ ସୁବିଧା ପାଇଁ JBPC ଠାରେ ଆଉ ଏକ ଅତିରିକ୍ତ ମହଲା (୨୭୦ ଗାଡ଼ି କ୍ଷମତା ସହ) ନିର୍ମାଣ କରାଯାଇଛି।

ଦୁଇ ଚକିଆ ଗାଡ଼ି ପାଇଁ ବିରାଟ ପାର୍କିଂ

ଦୁଇ ଚକିଆ ଯାନ ପାଇଁ ୪ଟି ପ୍ରମୁଖ ସ୍ଥାନ ଚିହ୍ନଟ ହୋଇଛି (ମାଟିଟୋଟା-୧, ମାଟିଟୋଟା-୨, ପୁରୁଣା ଜଗନ୍ନାଥ ବଲ୍ଲଭ, ଏବଂ ନୀଳ ପତାକା-ନୀଳାଚଳ ଅଶୋକ)। ଏଠାରେ ମୋଟ ୧୫,୦୦୦ ବାଇକ୍ ପାର୍କିଂ ହୋଇପାରିବ।

ବସ୍ ପାଇଁ ସ୍ୱତନ୍ତ୍ର ସ୍ଥାନ

ମାଳତୀପାଟପୁର, ତାଳବଣିଆ, ସ୍ୱାମୀ ନାରାୟଣ ମନ୍ଦିର ଏବଂ ସମଙ୍ଗା ଠାରେ ମୋଟ ୪ଟି ବଡ଼ ପାର୍କିଂ କରାଯାଇଛି, ଯେଉଁଠାରେ ୭୫୦ଟି ବସ୍ ରହିବାର କ୍ଷମତା ଅଛି।

ଭକ୍ତମାନେ ବିନା କୌଣସି ପାସରେ ନିମ୍ନଲିଖିତ ୧୮ଟି ସ୍ଥାନରେ ଗାଡ଼ି ପାର୍କିଂ କରିପାରିବେ

ସମଙ୍ଗା ପାର୍କିଂ, କେନ୍ଦ୍ରୀୟ ବିଦ୍ୟାଳୟ ପରିସର ଓ ଏହାର ନିକଟବର୍ତ୍ତୀ (SCS କଲେଜ) ଅଞ୍ଚଳ, ଶ୍ରୀ ସେତୁ (ବୃତ୍ତାନ୍ତ କ୍ଷେତ୍ର), ଭୁଦାନ, ଆଇଟିଆଇ କଲେଜ, ହେଲିପ୍ୟାଡ୍, ଉଦ୍ୟାନ ପାର୍କିଂ, ଓଲା ଗେଷ୍ଟ ହାଉସ୍, ତାଳବଣିଆ ମାଛ ମାର୍କେଟ୍, ଇଣ୍ଡୋର ଷ୍ଟାଡିୟମ୍, ସରଧାବାଲି (ସୁନାବେଶ ପାଇଁ), ସ୍ୱସ୍ତିରୁ ଷ୍ଟର୍ଲିଂ ରୋଡ୍, ଜେଲ୍ ରୋଡ୍/ପୁରୁଷୋତ୍ତମ ପାର୍କିଂ (ଜରୁରୀକାଳୀନ), ଏବଂ ଷ୍ଟର୍ଲିଂ ଛକର ବିଭିନ୍ନ ପାର୍ଶ୍ୱରେ ଥିବା ପାର୍କିଂ ସ୍ଥାନ।

ଡିଜିଟାଲ୍ ସର୍ଭେଲାନ୍ସ: ଡ୍ରୋନ୍ ଏବଂ AI ଉପରେ ନଜର

ଟ୍ରାଫିକ୍ ନିୟନ୍ତ୍ରଣକୁ ସ୍ମାର୍ଟ କରିବା ପାଇଁ ଏଥର ମାନୁଆଲ୍ ସହ ଏଆଇ (AI) ଆଧାରିତ ସିଷ୍ଟମ୍ ବ୍ୟବହାର କରାଯାଉଛି, ଯାହା ଗାଡ଼ିର ଆଗମନ ଓ ପ୍ରସ୍ଥାନକୁ ସଠିକ୍ ଭାବେ ଗଣନା କରିବ। ପୁରୀକୁ ପ୍ରବେଶ କରୁଥିବା ଗାଡ଼ି ଏବଂ ଭକ୍ତଙ୍କ ଗହଳି ଉପରେ ନଜର ରଖିବାକୁ ୩ଟି ଡ୍ରୋନ୍ ଏବଂ ୨୪୪ଟି ଉଚ୍ଚକ୍ଷମତା ସମ୍ପନ୍ନ ସିସିଟିଭି କ୍ୟାମେରା ଖଞ୍ଜା ଯାଇଛି। କଣ୍ଟ୍ରୋଲ୍ ରୁମ୍ରୁ ପ୍ରତିଟି ଗତିବିଧିକୁ ୨୪ ଘଣ୍ଟା ମୋନିଟରିଂ କରାଯାଉଛି।

ଲାଇଭ୍ ଟ୍ରାଫିକ୍ ଅପଡେଟ୍: LED ସ୍କ୍ରିନ୍ ଓ ମୋବାଇଲ୍ SMS ବ୍ୟବସ୍ଥା

ଭକ୍ତମାନେ ଯେପରି କୌଣସି ଜାମରେ ନ ଫସିବେ, ସେଥିପାଇଁ ରାଜପଥରେ ଏକାଧିକ ରିଅଲ୍-ଟାଇମ୍ ଏଲ୍ଇଡି (LED) ସ୍କ୍ରିନ୍ ଲଗାଯାଇଛି।

ମୋବାଇଲ୍ LED: ଉତ୍ତରା-ଲିଙ୍ଗିପୁର ଏବଂ ଭୁବନେଶ୍ୱର-ପୁରୀ ରୁଟ୍ରେ ୨ଟି ମୋବାଇଲ୍ ଏଲ୍ଇଡି ଗାଡ଼ି ବୁଲି ବୁଲି ଟ୍ରାଫିକ୍ ଅପଡେଟ୍ ଓ ମାଳତୀପାଟପୁର ଜାମ୍ ସୂଚନା ପ୍ରସାରଣ କରୁଛନ୍ତି।

ମୋବାଇଲକୁ ମେସେଜ୍: ଯାତ୍ରୀଙ୍କ ସୁବିଧା ପାଇଁ ବଲ୍କ ଏସଏମଏସ (SMS) ବ୍ୟବସ୍ଥା କରାଯାଇଛି, ଯାହା ମାଳତୀପାଟପୁର ଓ ବାଟଗାଁ ଅଞ୍ଚଳରେ ଥିବା ଭିଡ଼ ବାବଦରେ ସିଧାସଳଖ ଲୋକଙ୍କୁ ସତର୍କ କରାଇବ।

୧,୬୪୫ ସାଇନେଜ୍: ଲୋକଙ୍କ ମାର୍ଗଦର୍ଶନ ପାଇଁ ସହରରେ ୫୯୫ଟି ସ୍ଥାୟୀ ଏବଂ ୧,୦୫୦ଟି ଅସ୍ଥାୟୀ ସୂଚନା ବୋର୍ଡ ବା ସାଇନେଜ୍ ଲଗାଯାଇଛି।

୭୩ଟି ସହାୟତା ପୋଷ୍ଟ; ଦିବ୍ୟାଙ୍ଗ ଓ ବରିଷ୍ଠ ନାଗରିକଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା

ଶ୍ରଦ୍ଧାଳୁଙ୍କୁ ସହଯୋଗ କରିବା ପାଇଁ ସମଗ୍ର ପୁରୀ ଜିଲ୍ଲାରେ ୭୩ଟି ଟ୍ରାଫିକ୍ ସହାୟତା ପୋଷ୍ଟ ସ୍ଥାପନ କରାଯାଇଛି। ଏହା ବ୍ୟତୀତ ତାଳବଣିଆ ଏବଂ ମାଳତୀପାଟପୁର ଠାରେ ୨ଟି ବିଶେଷ ‘ମଡେଲ୍ ଟ୍ରାଫିକ୍ ସହାୟତା ପୋଷ୍ଟ’ କରାଯାଇଛି, ଯେଉଁଠାରେ ବରିଷ୍ଠ ନାଗରିକ ଓ ଦିବ୍ୟାଙ୍ଗଙ୍କ ପାଇଁ ପାନୀୟ ଜଳ, ବିଶ୍ରାମ ଗୃହ ଏବଂ ଅନ୍ୟାନ୍ୟ ଜରୁରୀ ସେବା ଉପଲବ୍ଧ କରାଯାଇଛି।

ଏହିସବୁ ରାସ୍ତାରେ ଗାଡ଼ି ଚଳାଚଳ ସମ୍ପୂର୍ଣ୍ଣ ବନ୍ଦ: ‘ନୋ-ଭେହିକିଲ୍ ଜୋନ୍’

ବଡ଼ଦାଣ୍ଡ ଏବଂ ଗଳିକନ୍ଦିରେ ଶୃଙ୍ଖଳା ରକ୍ଷା ପାଇଁ ପରିବହନ କମିଶନରଙ୍କ ନିର୍ଦ୍ଦେଶକ୍ରମେ ନିମ୍ନଲିଖିତ ମାର୍ଗଗୁଡ଼ିକୁ ସମ୍ପୂର୍ଣ୍ଣ ଗାଡ଼ି ଶୂନ୍ୟ ବା ‘ନୋ-ଭେହିକିଲ୍ ଜୋନ୍’ ଭାବେ ଘୋଷଣା କରାଯାଇଛି:

ଶ୍ରୀମନ୍ଦିରରୁ ହସ୍ପିଟାଲ୍ କ୍ରସିଂ (ଗ୍ରାଣ୍ଡ ରୋଡ୍)

ଝାଡ଼େଶ୍ୱରୀ ଛକରୁ ହସ୍ପିଟାଲ୍ କ୍ରସିଂ

ଜେଲ୍ ରୋଡ୍ ପାର୍କିଂରୁ ହସ୍ପିଟାଲ୍ କ୍ରସିଂ

ବୃଷଭ ଛକରୁ ମନ୍ଦିର ପର୍ଯ୍ୟନ୍ତ

ସୋଲାଖିଆ ବରଗଛ ଛକରୁ ମନ୍ଦିର ପର୍ଯ୍ୟନ୍ତ

ମୋଚିସାହି ଛକରୁ ମନ୍ଦିର ପର୍ଯ୍ୟନ୍ତ

ଯାତ୍ରୀକାରୁ ଦିଗବାରେଣୀ ଛକ ପର୍ଯ୍ୟନ୍ତ ଗାଡ଼ି ପ୍ରବେଶ ସମ୍ପୂର୍ଣ୍ଣ ବାରଣ କରାଯାଇଛି।