ନୂଆଦିଲ୍ଲୀ: ଲାଇଟ୍, କ୍ୟାମେରା ଏବଂ ଆକ୍ସନ୍ ଦୁନିଆର ଜଣେ ଅଦ୍ୱିତୀୟ ନାୟକ ନାନା ପାଟେକର ହଠାତ୍ ଦୁନିଆରୁ ବିଦାୟ ନେଇଛନ୍ତି । ପ୍ରାୟ ପାଞ୍ଚ ଦଶନ୍ଧି ଧରି ସେ ଫିଲ୍ମ ଦୁନିଆରେ ନିଜ ଅଭିନୟର ଯାଦୁ ଦେଖାଇଥିଲେ । ତାଙ୍କ ଡାଇଲଗ୍ ଏବଂ ଅଭିନୟରେ ସେ ଲୋକଙ୍କ ହୃଦୟରେ ସ୍ୱତନ୍ତ୍ର ସ୍ଥାନ ପାଇଥିଲେ । ନାନା ସେହି ହାତ ଗଣତି କଳାକାରମାନଙ୍କ ମଧ୍ୟରୁ ଜଣେ ଥିଲେ, ଯିଏ ନିଜ ସର୍ତ୍ତରେ ସିନେମାରେ କାମ କଲେ ଏବଂ ସେହିପରି ନିଜ ଜୀବନ ମଧ୍ୟ ବିତାଇଲେ ।
ନାନା ପାଟେକରଙ୍କ ମୃତ୍ୟୁ ଗୁରୁବାର ୭୫ ବର୍ଷ ବୟସରେ ଗୋଆରେ ହୋଇଛି । ହୃଦଘାତ ଯୋଗୁଁ ତାଙ୍କର ମୃତ୍ୟୁ ଘଟିଥିବା କୁହାଯାଉଛି । ନାନା ପାଟେକରଙ୍କୁ ୭୫ ବର୍ଷ ହୋଇଥିଲେ ବି ସେ ସମ୍ପୂର୍ଣ୍ଣ ଫିଟ୍ ଥିଲେ ଏବଂ ନିରନ୍ତର କାମ କରୁଥିଲେ । ଏହି ବର୍ଷ ତାଙ୍କର ଫିଲ୍ମ ‘ଓ ରୋମିଓ’ ମଧ୍ୟ ଆସିଥିଲା । ନିକଟରେ ସେ ୱେବ୍ ସିରିଜ୍ ‘ସଙ୍କଳ୍ପ’ରେ ମଧ୍ୟ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିଥିଲେ ।
ଗୋଆରେ ଏକାକୀ ଥିଲେ ନାନା ପାଟେକର
ଫିଲ୍ମ ସହିତ ନାନା ପାଟେକର ସମାଜସେବା ଏବଂ ବିଭିନ୍ନ କାର୍ଯ୍ୟକ୍ରମରେ ଯୋଗ ଦେଉଥିଲେ । ସୂଚନା ଅନୁସାରେ, ଗୋଟିଏ କାର୍ଯ୍ୟକ୍ରମ ପାଇଁ ସେ ଗୋଆରେ ଥିଲେ । ଗୋଆରେ ଯେତେବେଳେ ତାଙ୍କ ଦେହ ଖରାପ ହେଲା, ସେତେବେଳେ ସେ ନିଜ ଫ୍ଲାଟ୍ରେ ଏକାକୀ ଥିଲେ । ଶେଷ କିଛି ଘଣ୍ଟାରେ କ’ଣ ଘଟିଥିଲା, ସେ ସମ୍ପର୍କରେ ମଣିପାଲ ହସ୍ପିଟାଲର ବରିଷ୍ଠ ଡାକ୍ତର ଶେଖର ସାଲକର ସୂଚନା ଦେଇଛନ୍ତି ।
ନାନାଙ୍କ ଶେଷ ୨ ଘଣ୍ଟା ୫୦ ମିନିଟ୍
ରାତି ୨ଟା ୩୦: ଡାକ୍ତରଙ୍କ କହିବା ଅନୁଯାୟୀ, ଦେହ ଖରାପ ଲାଗିବାରୁ ନାନା ପାଟେକର ନିଜର ଜଣେ ବନ୍ଧୁଙ୍କୁ ମେସେଜ୍ କରି ଭଲ ଲାଗୁନି ବୋଲି କହିଥିଲେ ।
ଭୋର ୪ଟା : ରାତି ସମୟ ହୋଇଥିବାରୁ ବନ୍ଧୁଜଣକ ମେସେଜ୍ ବିଳମ୍ୱରେ ଦେଖିଥିଲେ । ମେସେଜ୍ ପଢ଼ିବା କ୍ଷଣି ପ୍ରାୟ ୪ଟା ବେଳେ ସେ ନାନାଙ୍କ ଘରେ ପହଞ୍ଚିଥିଲେ ।
ଭୋର ୪ଟା ୧୮: ଆମ୍ବୁଲାନ୍ସ ପଠାଇବା ପାଇଁ ହସ୍ପିଟାଲକୁ କଲ୍ କରାଗଲା ।
ଭୋର ୪ଟା ୨୦: ଆମ୍ବୁଲାନ୍ସ ତାଙ୍କ ଘରେ ପହଞ୍ଚିଗଲା ।
ଭୋର ୪ଟା ୩୦: ନାନା ପାଟେକରଙ୍କୁ ଘରୁ ହସ୍ପିଟାଲକୁ ସିଫ୍ଟ କରାଗଲା ।
ସକାଳ ୫ଟା ୨୦: ପ୍ରାୟ ୪୫ ମିନିଟରୁ ୧ ଘଣ୍ଟା ପର୍ଯ୍ୟନ୍ତ ସିପିଆର୍ ଦେବା ପରେ ଡାକ୍ତରମାନେ ନାନା ପାଟେକରଙ୍କୁ ମୃତ ଘୋଷଣା କଲେ ।
ରାଜକୀୟ ସମ୍ମାନ ସହ ହେବ ଶେଷକୃତ୍ୟ
ମହାରାଷ୍ଟ୍ର ସରକାର ନାନା ପାଟେକରଙ୍କୁ ରାଜକୀୟ ସମ୍ମାନ ସହ ଶେଷ ବିଦାୟ ଦେବେ । ନାନା ପାଟେକରଙ୍କ ଶେଷ ଇଚ୍ଛା ଅନୁସାରେ ତାଙ୍କର ଶେଷକୃତ୍ୟ ପୁଣେର ଡୋନଜେ ଗାଁରେ ଥିବା ତାଙ୍କ ନିଜ ଫାର୍ମହାଉସରେ ହିଁ କରାଯିବ ।
