ନୂଆଦିଲ୍ଲୀ: ଭିଡିଓ କରି ରୋଜଗାରର ସ୍ୱପ୍ନ ଦେଖୁଥିବା ଲୋକଙ୍କୁ ଲାଗିବାକୁ ଯାଉଛି ଏକ ବଡ଼ ଝଟକା । ୟୁଟ୍ୟୁବ୍ ନିଜ ପାର୍ଟନର ପ୍ରୋଗ୍ରାମ ନିୟମରେ ପରିବର୍ତ୍ତନ ନେଇ ଘୋଷଣା କରିଛି । ନୂଆ ନିୟମ ୨୦୨୭ ଫେବ୍ରୁଆରୀ ୧ରୁ ଲାଗୁ ହେବ । ଏହା ସହିତ କମ୍ପାନି ଭିଡିଓର ଭ୍ୟୁ କାଉଣ୍ଟ ନିୟମରେ ବଡ଼ ପରିବର୍ତ୍ତନ କରିଛି । ଭ୍ୟୁ କାଉଣ୍ଟର ଏହି ନୂଆ ନିୟମ ଅଗଷ୍ଟ ୨୪ରୁ ଆରମ୍ଭ ହେବ ।
ସବୁଠାରୁ ବଡ଼ ପରିବର୍ତ୍ତନ ସେମାନଙ୍କ ପାଇଁ ଯେଉଁମାନେ ଭବିଷ୍ୟତରେ ଏକ ନୂତନ ଚ୍ୟାନେଲ୍ ଆରମ୍ଭ କରି ବିଜ୍ଞାପନ ମାଧ୍ୟମରେ ଟଙ୍କା ରୋଜଗାର କରିବାକୁ ଚାହାନ୍ତି । ଏବେ କେବଳ ୧୦୦୦ ସବସ୍କ୍ରାଇବର୍ ହାସଲ କରିବା ଯଥେଷ୍ଟ ହେବ ନାହିଁ । ନୂତନ କ୍ରିଏଟରମାନଙ୍କୁ ପୂର୍ବ ଅପେକ୍ଷା ଅଧିକ ଦେଖିବା ସମୟ କିମ୍ବା ସର୍ଟ୍ସ ଭ୍ୟୁ ସଂଗ୍ରହ କରିବାକୁ ପଡ଼ିବ । ପୂର୍ବରୁ, ବିଜ୍ଞାପନ ଏବଂ ପ୍ରିମିୟମ୍ ରାଜସ୍ୱ ପାଇଁ ଯୋଗ୍ୟ ହେବା ପାଇଁ କ୍ରିଏଟରମାନଙ୍କୁ ୧୦୦୦ ସବସ୍କ୍ରାଇବର୍, ଶେଷ ୧୨ ମାସରେ ୪୦୦୦ ଭାଲିଡ୍ ପବ୍ଲିକ୍ ହ୍ୱାଚ୍ ଆୱାର୍ସ କିମ୍ବା ଗତ ୯୦ ଦିନରେ ୧ କୋଟି ପବ୍ଲିକ୍ ସର୍ଟ୍ସ ଭ୍ୟୁ ଆବଶ୍ୟକ ଥିଲା ।
କିନ୍ତୁ ୨୦୨୭ ଫେବ୍ରୁଆରୀ ୧ରୁ ନୂତନ ୟୁଜରଙ୍କୁ ୯୦ ଦିନ ମଧ୍ୟରେ ୧୦୦୦ ସବସ୍କ୍ରାଇବର, ୮,୦୦୦ ଭାଲିଡ୍ ପବ୍ଲିକ୍ ହ୍ୱାଚ୍ ଆୱାର୍ସ କିମ୍ବା ୨କୋଟି ପବ୍ଲିକ୍ ସର୍ଟ୍ସ ଭ୍ୟୁ ଆବଶ୍ୟକ ହେବ । ଏହାର ଅର୍ଥ ହେଉଛି ଲମ୍ବା ଭିଡିଓ କ୍ରିଏଟରଙ୍କ ପାଇଁ ୱାଚ୍ ଟାଇମ୍ ଦ୍ୱିଗୁଣିତ ହେବ ଏବଂ ସର୍ଟ୍ସ କ୍ରିଏଟରଙ୍କ ପାଇଁ ମଧ୍ୟ ଯଥେଷ୍ଟ ବୃଦ୍ଧି ପାଇବ । ଏହି ପରିବର୍ତ୍ତନର ଅର୍ଥ ନୁହେଁ ଯେ ପାର୍ଟନର ପ୍ରୋଗ୍ରାମରେ ପୂର୍ବରୁ ଥିବା କ୍ରିଏଟରମାନଙ୍କୁ ବାଦ୍ ଦିଆଯିବ ।
ନୂତନ ନିୟମଗୁଡ଼ିକ ମୁଖ୍ୟତଃ ସେହି କ୍ରିଏଟରମାନଙ୍କ ପାଇଁ ହେବ ଯେଉଁମାନେ ୨୦୨୭ ଫେବ୍ରୁଆରୀ ୧ ପରେ ବିଜ୍ଞାପନ ଏବଂ ପ୍ରିମିୟମ୍ ରାଜସ୍ୱ ପାଇଁ ନୂତନ ଆବେଦନ ଦାଖଲ କରିବେ । ପ୍ରୋଗ୍ରାମରେ ପୂର୍ବରୁ ପଞ୍ଜୀକୃତ ଚ୍ୟାନେଲଗୁଡ଼ିକ ଏହି ପରିବର୍ତ୍ତନ ଦ୍ୱାରା ପ୍ରଭାବିତ ହେବେ ନାହିଁ । ତଥାପି, ଛୋଟ କ୍ରିଏଟରମାନଙ୍କ ପାଇଁ କିଛି ଆଶ୍ୱସ୍ତି ଅଛି । ଫ୍ୟାନ ଫଣ୍ଡିଂ, ଚ୍ୟାନେଲ ମେମ୍ୱରଶିପ୍, ସୁପର ଚାଟ୍, ସପିଂ ଏବଂ ଅନ୍ୟ କିଛି ଫିଚର୍ ଅପରିବର୍ତ୍ତିତ ଅଛି ।
ସର୍ଟ୍ସରୁ ରୋଜଗାର କରୁଥିବା ଲୋକଙ୍କ ପାଇଁ ମଧ୍ୟ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆସିଛି । ଫେବ୍ରୁଆରୀ ୧ରୁ ସର୍ଟ୍ସ କ୍ରିଏଟର୍ ପୁଲରୁ ବିଜ୍ଞାପନ ଏବଂ ପ୍ରିମିୟମ୍ ରାଜସ୍ୱ ପାଇବା ପାଇଁ ଏକ ଚ୍ୟାନେଲକୁ ୯୦ ଦିନରେ ୧୦ ନିୟୁତ ସର୍ଟ୍ସ ଭ୍ୟୁ ରଖିବାକୁ ପଡିବ । ଏହାକୁ ପୂରଣ କରିବାରେ ବିଫଳ ଚ୍ୟାନେଲକୁ ପାର୍ଟନର୍ ପ୍ରୋଗ୍ରାମରୁ ବାଦ୍ ଦିଆଯିବ ନାହିଁ, କିନ୍ତୁ ସେହି ସମୟ ମଧ୍ୟରେ ସର୍ଟ୍ସ ବିଜ୍ଞାପନ ଏବଂ ପ୍ରିମିୟମ୍ ରାଜସ୍ୱ ଅଂଶ ପାଇବେ ନାହିଁ ।
