ଧର୍ମେନ୍ଦ୍ର ପ୍ରଧାନ ପ୍ରଥମ ଦିନରୁ ହିଁ ଇସ୍ତଫା ଦେବାକୁ ପ୍ରସ୍ତାବ ଦେଇଥିଲେ: ବରିଷ୍ଠ ବିଜେପି ନେତାଙ୍କ ଦାବି
ଇନ୍ଦୋର: ମଧ୍ୟପ୍ରଦେଶ ସରକାରଙ୍କ ମନ୍ତ୍ରୀ ବିଜେପି ନେତା କୈଳାସ ବିଜୟବର୍ଗୀୟ ସିଜେପି ଆନ୍ଦୋଳନକୁ ହାତିଆର କରିବାକୁ ଚେଷ୍ଟା କରୁଥିବା ବିରୋଧୀ ଦଳଗୁଡ଼ିକୁ କଡ଼ା ସମାଲୋଚନା କରିଛନ୍ତି । ଏହାସହ ନିଜେ ନେତୃତ୍ୱ ନେଇ ନ ଥିବା ଏକ ଆନ୍ଦୋଳନ ପାଇଁ ଶ୍ରେୟ ନେଉଥିବାରୁ ଏବଂ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫାରେ ଖୁସି ଦେଉଥିବା କଂଗ୍ରେସକୁ ନିନ୍ଦା କରିଛନ୍ତି ।
ଛାତ୍ର ଆନ୍ଦୋଳନର ପ୍ରଥମ ଦିନରେ ହିଁ ପୂର୍ବତନ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ନିଜର ଇସ୍ତଫା ଦେବାକୁ ପ୍ରସ୍ତାବ ଦେଇଥିଲେ । ଏକଥା ବରିଷ୍ଠ ବିଜେପି ନେତା କୈଳାସ ବିଜୟବର୍ଗୀୟ କହିଛନ୍ତି । ନିଟ୍ ପ୍ରଶ୍ନପତ୍ର ଲିକ୍ ବିବାଦକୁ ନେଇ ବିରୋଧ ପ୍ରଦର୍ଶନ ତୀବ୍ର ହେବା ପରେ ଧର୍ମେନ୍ଦ୍ର ପ୍ରଧାନ ନିଜ ପଦବୀରୁ ଇସ୍ତଫା ଦେଇଛନ୍ତି । ମଧ୍ୟପ୍ରଦେଶ ସରକାରଙ୍କ ମନ୍ତ୍ରୀ ବିଜୟବର୍ଗୀୟ କହିଛନ୍ତି ଯେ, ସେ ଛାତ୍ର ରାଜନୀତି ଦିନରୁ ଧର୍ମେନ୍ଦ୍ର ପ୍ରଧାନଙ୍କୁ ଜାଣିଛନ୍ତି ଏବଂ ତାଙ୍କର ସଚ୍ଚୋଟତା ଓ ନିଷ୍ଠା ପ୍ରଶଂସନୀୟ ।
ଇନ୍ଦୋରଠାରେ ସାମ୍ବାଦିକମାନଙ୍କୁ ବିଜୟବର୍ଗୀୟ କହିଛନ୍ତି, “ଆନ୍ଦୋଳନର ପ୍ରଥମ ଦିନରେ ହିଁ ସେ ଦଳୀୟ ଅଧ୍ୟକ୍ଷଙ୍କୁ କହିଥିଲେ, ‘ଯଦି ଆପଣ ଭାବୁଛନ୍ତି ଯେ ମୋର ଇସ୍ତଫା ଦେବା ଉଚିତ୍, ତେବେ ମୁଁ ଇସ୍ତଫା ଦେବି ।’ ସେତେବେଳେ ଦଳୀୟ ଅଧ୍ୟକ୍ଷ ମନା କରିଥିଲେ । ମାତ୍ର ପରିସ୍ଥିତି ଏପରି ହେଲା ଯେ ଦଳ ତାଙ୍କୁ ଇସ୍ତଫା ଦେବାକୁ ନିଷ୍ପତ୍ତି ନେଲା ଏବଂ ସେ ସଙ୍ଗେସଙ୍ଗେ ଇସ୍ତଫା ଦେଇଦେଲେ ।”
ସେ ଆହୁରି କହିଛନ୍ତି ଯେ ଜଣେ ଶୃଙ୍ଖଳିତ ଦଳୀୟ କାର୍ଯ୍ୟକର୍ତ୍ତାଙ୍କର ଏହା ହିଁ ଅସଲ ପରିଚୟ । ଧର୍ମେନ୍ଦ୍ର ପ୍ରଧାନଙ୍କୁ ଯେଉଁ ଦାୟିତ୍ୱ ଦିଆଯାଇଥିଲା, ସେ ତାହାକୁ ସମ୍ପୂର୍ଣ୍ଣ ନିଷ୍ଠା ଓ ସଚ୍ଚୋଟତାର ସହ ପାଳନ କରିଛନ୍ତି ।
ବିଜୟବର୍ଗୀୟ ଆହୁରି କହିଛନ୍ତି, ବାଂଲାଦେଶ ଏବଂ ଶ୍ରୀଲଙ୍କାରେ ହୋଇଥିବା ଭଳି ହିଂସା କରି ଭାରତକୁ ଅସ୍ଥିର କରିବାକୁ ଚାହୁଁଥିବା “ବୈଦେଶିକ ଶକ୍ତି”ଗୁଡ଼ିକର ଷଡ଼ଯନ୍ତ୍ରକୁ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ପଣ୍ଡ କରିଦେଇଛି । ସେ ଯାହା କରିଛନ୍ତି, ସେଥିପାଇଁ ମୁଁ ତାଙ୍କୁ ଶୁଭେଚ୍ଛା ଜଣାଉଛି।”
ବରିଷ୍ଠ ବିଜେପି ନେତା କହିଛନ୍ତି, “ଛାତ୍ରମାନେ ଏହି ଆନ୍ଦୋଳନ ଆରମ୍ଭ କରିଥିଲେ, କିନ୍ତୁ କଂଗ୍ରେସ କେବଳ ସେମାନଙ୍କ ପଛରେ ଛିଡ଼ା ହୋଇଥିଲା। ।” ଏହାସହ ନିଜେ ନେତୃତ୍ୱ ନେଇ ନ ଥିବା ଏକ ଆନ୍ଦୋଳନର ଶ୍ରେୟ ନେଉଥିବାରୁ ସେ କଂଗ୍ରେସକୁ ନିନ୍ଦା କରିଛନ୍ତି ।
