ନୂଆଦିଲ୍ଲୀ: ଆଫ୍ରିକୀୟ ଦେଶ କଙ୍ଗୋରେ ଇବୋଲା ଭୂତାଣୁ (Ebola Virus)ର ପ୍ରକୋପ ଦିନକୁ ଦିନ ଅତି ଭୟାନକ ରୂପ ନେବାରେ ଲାଗିଛି। ଦେଶର ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ୱାରା ଜାରି କରାଯାଇଥିବା ତଥ୍ୟ ଅନୁଯାୟୀ, ଏହି ସଂକ୍ରମଣରେ ମୃତ୍ୟୁ ସଂଖ୍ୟା ୯୩୦ ରେ ପହଞ୍ଚିଛି। ମେ’ ୧୫ ରେ ପୂର୍ବ କଙ୍ଗୋରେ ଏହି ମହାମାରୀ ଘୋଷଣା ହେବା ପରଠାରୁ ଏପର୍ଯ୍ୟନ୍ତ ପ୍ରାୟ ୨,୩୪୪ ଜଣ ସଂକ୍ରମିତ ଚିହ୍ନଟ ହୋଇସାରିଛନ୍ତି। ଏହା ଇତିହାସରେ ସବୁଠାରୁ ଦ୍ରୁତ ଗତିରେ ବ୍ୟାପୁଥିବା ଇବୋଲା ସଂକ୍ରମଣ ବୋଲି କୁହାଯାଉଛି। କେବଳ ଗୋଟିଏ ଦିନରେ ପ୍ରାୟ ୩୭ ଜଣଙ୍କର ମୃତ୍ୟୁ ରେକର୍ଡ କରାଯାଇଛି, ଯାହା ସ୍ଥିତିର ଗମ୍ଭୀରତାକୁ ଦର୍ଶାଉଛି।
ଏହି ମହାମାରୀକୁ ନିୟନ୍ତ୍ରଣ କରିବା କ୍ଷେତ୍ରରେ କିଛି ବଡ଼ ଆହ୍ୱାନ ଦେଖାଦେଇଛି । ସଂକ୍ରମଣ ପାଇଁ ‘ବୁଣ୍ଡିବୁଗ୍ୟୋ’ (Bundibugyo) ନାମକ ଏକ ବିରଳ ଭୂତାଣୁ ଦାୟୀ। ସବୁଠାରୁ ଚିନ୍ତାଜନକ କଥା ହେଉଛି, ଏହି ନିର୍ଦ୍ଦିଷ୍ଟ ଭୂତାଣୁ ବିରୋଧରେ ଲଢ଼ିବା ପାଇଁ ଏପର୍ଯ୍ୟନ୍ତ କୌଣସି ସ୍ୱୀକୃତିପ୍ରାପ୍ତ ଟିକା (Vaccine) କିମ୍ବା ସଠିକ୍ ଚିକିତ୍ସା ଉପଲବ୍ଧ ନାହିଁ।
ସବୁଠାରୁ ଅଧିକ ପ୍ରଭାବିତ ହୋଇଥିବା ‘ଇଟୁରୀ’ ପ୍ରଦେଶରେ ସୁରକ୍ଷା ବ୍ୟବସ୍ଥା ବିପର୍ଯ୍ୟସ୍ତ ହୋଇପଡ଼ିଛି। ସଂକ୍ରମଣ ଘୋଷଣା ହେବା ପରଠାରୁ ସ୍ୱାସ୍ଥ୍ୟ କେନ୍ଦ୍ର ଏବଂ ମେଡିକାଲ ଟିମ୍ ଉପରେ ପ୍ରାୟ ୧୨ ରୁ ଅଧିକ ଆକ୍ରମଣ ହୋଇସାରିଛି, ଯାହା ଉଦ୍ଧାର ଓ ଚିକିତ୍ସା କାର୍ଯ୍ୟରେ ବାଧା ସୃଷ୍ଟି କରୁଛି। ଦରମା ବା ପାରିଶ୍ରମିକ ନମିଳିବା କାରଣରୁ ଅନେକ ସ୍ୱାସ୍ଥ୍ୟକର୍ମୀ କାମ ବନ୍ଦ କରି ପ୍ରତିବାଦ କରୁଛନ୍ତି। ଅନ୍ୟପଟେ, ସଂକ୍ରମିତ ରୋଗୀଙ୍କ ସେବା କରୁ କରୁ ନିଜେ ସଂକ୍ରମିତ ହୋଇ ୩୬ ଜଣ ସ୍ୱାସ୍ଥ୍ୟକର୍ମୀ ପ୍ରାଣ ହରାଇଛନ୍ତି।
ସରକାରଙ୍କ ସୂଚନା ଅନୁଯାୟୀ, ବର୍ତ୍ତମାନ ପ୍ରାୟ ୭୨୪ ଜଣ ରୋଗୀଙ୍କୁ ବିଭିନ୍ନ ହସ୍ପିଟାଲର ଆଇସୋଲେସନ ଓ୍ବାର୍ଡରେ ରଖି ଚିକିତ୍ସା କରାଯାଉଛି। ପ୍ରଭାବିତ ଅଞ୍ଚଳଗୁଡ଼ିକରେ ଏହି ମହାମାରୀର ମୁକାବିଲା କରିବା ପାଇଁ ପ୍ରଶାସନ ତରଫରୁ ପ୍ରୟାସକୁ ଆହୁରି ଜୋରଦାର କରାଯାଉଛି।
