ନୂଆଦିଲ୍ଲୀ: ୟୁକ୍ରେନ ସହିତ ଚାଲିଥିବା ଦୀର୍ଘଦିନର ଯୁଦ୍ଧ ମଧ୍ୟରେ ରୁଷିଆ ଏବେ ଏକ ବଡ଼ ଆଭ୍ୟନ୍ତରୀଣ ସଙ୍କଟ ମଧ୍ୟକୁ ଠେଲି ହୋଇଯାଇଛି। ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନ ସୋମବାର (୨୯ ଜୁନ୍) ସ୍ୱୀକାର କରିଛନ୍ତି ଯେ, ତାଙ୍କ ଦେଶ ବର୍ତ୍ତମାନ ପ୍ରବଳ ଇନ୍ଧନ (ତେଲ) ଅଭାବର ସମ୍ମୁଖୀନ ହେଉଛି। ୟୁକ୍ରେନ ସହ ଚାଲିଥିବା ଯୁଦ୍ଧ ଯୋଗୁଁ ଦେଶର ଘରୋଇ ଯୋଗାଣ ବ୍ୟବସ୍ଥା ସମ୍ପୂର୍ଣ୍ଣ ଭାବରେ ବାଧାପ୍ରାପ୍ତ ହୋଇଛି। ତେବେ ସମଗ୍ର ଦେଶରେ ଯେପରି ସଠିକ୍ ଭାବେ ଇନ୍ଧନ ବଣ୍ଟନ କରାଯାଇପାରିବ, ସେଥିପାଇଁ ସରକାର ନିରନ୍ତର କାର୍ଯ୍ୟ କରୁଛନ୍ତି ବୋଲି ସେ କହିଛନ୍ତି। ଇନ୍ଧନ ଯୋଗାଣ ଏବଂ ବଣ୍ଟନ ସମ୍ପର୍କରେ ବରିଷ୍ଠ ଅଧିକାରୀମାନଙ୍କ ସହ ଆୟୋଜିତ ଏକ ଜରୁରୀକାଳୀନ ବୈଠକରେ ପୁଟିନ କହିଛନ୍ତି ଯେ, ଏହି ସଙ୍କଟର ସମାଧାନ ପାଇଁ ଏକ ସ୍ୱତନ୍ତ୍ର ଟାସ୍କ ଫୋର୍ସ ଗଠନ କରାଯାଇଛି।
ୟୁକ୍ରେନ ପକ୍ଷରୁ ରୁଷିଆର ତୈଳ ଭିତ୍ତିଭୂମି ଉପରେ କ୍ରମାଗତ ଭାବରେ ଡ୍ରୋନ୍ ଆକ୍ରମଣ କରାଯାଉଛି। ଏହି ଆକ୍ରମଣ ଯୋଗୁଁ ରୁଷିଆର ତୈଳ ବିଶୋଧନାଗାର ଓ ସଂରକ୍ଷଣ କେନ୍ଦ୍ରଗୁଡ଼ିକ ବ୍ୟାପକ କ୍ଷତିଗ୍ରସ୍ତ ହୋଇଛି, ଯାହା ଯୋଗାଣ ଶୃଙ୍ଖଳାକୁ ଭାଙ୍ଗି ଦେଇଛି। ଦେଶର ବିଭିନ୍ନ ପ୍ରାନ୍ତରେ ଥିବା ପେଟ୍ରୋଲ ପମ୍ପଗୁଡ଼ିକରେ ଗାଡ଼ି ଚାଳକ ଏବଂ ବ୍ୟବସାୟୀମାନଙ୍କର ଦୀର୍ଘ ଲାଇନ୍ ଦେଖିବାକୁ ମିଳୁଛି। ଲୋକଙ୍କୁ ଘଣ୍ଟା ଘଣ୍ଟା ଅପେକ୍ଷା କରିବାକୁ ପଡ଼ୁଛି। ପୁଟିନ କହିଛନ୍ତି ଯେ, ଗ୍ରାହକମାନଙ୍କୁ ସେମାନଙ୍କ ଗାଡ଼ି ପାଇଁ ଉପଯୁକ୍ତ ଗ୍ରେଡର ପେଟ୍ରୋଲ ବା ଗ୍ୟାସୋଲିନ୍ ମିଳିପାରୁ ନାହିଁ, ଯାହା ସମସ୍ୟାକୁ ଆହୁରି ବଢ଼ାଇ ଦେଇଛି।
ରୁଷିଆର ରାଷ୍ଟ୍ରପତି ୟୁକ୍ରେନର ଏହି ଆକ୍ରମଣକୁ ସାଧାରଣ ନାଗରିକ ଏବଂ ଭିତ୍ତିଭୂମି ଉପରେ ଆତଙ୍କବାଦୀ ଆକ୍ରମଣ”ବୋଲି ଅଭିହିତ କରିଛନ୍ତି। ସେ କହିଛନ୍ତି ଯେ, ନିଜର ଶକ୍ତି କ୍ଷେତ୍ର ଉପରେ ହେଉଥିବା ଆକ୍ରମଣର ପ୍ରଭାବକୁ ରୁଷିଆକୁ ଯେକୌଣସି ପରିସ୍ଥିତିରେ ହ୍ରାସ କରିବାକୁ ହେବ। ଦେଶର ଆଭ୍ୟନ୍ତରୀଣ ବଜାରରେ ଇନ୍ଧନ ସ୍ଥିତିକୁ ସୁଧାରିବା ଏବଂ ସ୍ଥିରତା ଆଣିବା ପାଇଁ ରୁଷିଆ ସରକାର ବର୍ତ୍ତମାନ ଡିଜେଲ ରପ୍ତାନୀ ଉପରେ ସମ୍ପୂର୍ଣ୍ଣ ପ୍ରତିବନ୍ଧକ ଲଗାଇବାକୁ ଚିନ୍ତା କରୁଛନ୍ତି। ଅର୍ଥାତ୍ ରୁଷିଆ ନିଜ ଦେଶର ଡିଜେଲକୁ ଅନ୍ୟ କୌଣସି ଦେଶକୁ ବିକ୍ରି ନକରି କେବଳ ନିଜ ଦେଶର ଲୋକଙ୍କ ପାଇଁ ବ୍ୟବହାର କରିବ।
ତେବେ ଏଭଳି କଠୋର ପଦକ୍ଷେପ ନେବା ପୂର୍ବରୁ ପୁଟିନ ମଧ୍ୟ ଚେତାଇ ଦେଇଛନ୍ତି। ସେ କହିଛନ୍ତି ଯେ, ଏପରି କୌଣସି ନିଷ୍ପତ୍ତି ନିଆଯିବା ଉଚିତ୍ ନୁହେଁ ଯାହା ରୁଷିଆର ନିଜସ୍ୱ ତୈଳ ଶିଳ୍ପ ପାଇଁ ନୂତନ ସମସ୍ୟା ସୃଷ୍ଟି କରିବ। ଯଦି ଅତ୍ୟଧିକ ପ୍ରତିବନ୍ଧକ ଲଗାଯାଏ, ତେବେ ଦେଶର ଉତ୍ପାଦନକାରୀଙ୍କ ପାଖରେ ମାତ୍ରାଧିକ ଡିଜେଲ ଜମାହୋଇ ରହିଯିବ, ଯାହା କମ୍ପାନୀଗୁଡ଼ିକୁ ଆର୍ଥିକ ସଙ୍କଟକୁ ଠେଲିଦେବ। ତେଣୁ ସରକାର ସନ୍ତୁଳିତ ଭାବେ ଏହି ସମସ୍ୟାର ସମାଧାନ କରିବାକୁ ଚେଷ୍ଟା କରୁଛନ୍ତି।
