ନୂଆଦିଲ୍ଲୀ: ଆନ୍ଧ୍ରପ୍ରଦେଶର ‘ଡକ୍ଟର ବି ଆର୍ ଆମ୍ବେଦକର କୋନାସୀମା’ ଜିଲ୍ଲାର ରାଭୁଲାପାଲେମ୍ ମଣ୍ଡଳ ଅନ୍ତର୍ଗତ ଏକ ଗାଁ ନିକଟରେ ଏହି ଦୁଃଖଦ ଘଟଣା ଘଟିଛି। ୫୬ ବର୍ଷୀୟା ମିସାଲା ସୂର୍ଯ୍ୟାବତୀ ଏବଂ ତାଙ୍କର ୮୦ ବର୍ଷୀୟା ବୃଦ୍ଧା ମାଆ ବାଡାପଲ୍ଲୀ ବୁରମ୍ମା ମୁକ୍ତେଶ୍ୱରମ୍ ମୁଖ୍ୟ କେନାଲ୍କୁ ଡେଇଁ ଆତ୍ମହତ୍ୟା କରିଥିବା ସନ୍ଦେହ କରାଯାଉଛି।
ରବିବାର ସକାଳେ ସୂର୍ଯ୍ୟାବତୀ ଏବଂ ତାଙ୍କ ମାଆ ଚର୍ଚ୍ଚ ଯାଉଛନ୍ତି ବୋଲି ପରିବାର ଲୋକଙ୍କୁ କହି ଘରୁ ବାହାରିଥିଲେ। କିନ୍ତୁ ଦୀର୍ଘ ସମୟ ପର୍ଯ୍ୟନ୍ତ ସେମାନେ ନଫେରିବାରୁ ଖୋଜାଖୋଜି କରାଯାଇଥିଲା। ପରବର୍ତ୍ତୀ ସମୟରେ କେନାଲ ବ୍ରିଜ୍ ଉପରୁ ସେମାନଙ୍କର ବାଇବେଲ୍ ଏବଂ କିଛି ବ୍ୟକ୍ତିଗତ ସାମଗ୍ରୀ ମିଳିଥିଲା। ଏହାକୁ ଦେଖି ସେମାନେ ପାଣିକୁ ଡେଇଁ ପଡ଼ିଥିବା ପୋଲିସ ସନ୍ଦେହ କରିଥିଲା। ଉଦ୍ଧାରକାରୀ ଦଳ ସୂର୍ଯ୍ୟାବତୀଙ୍କ ମୃତଦେହ ଉଦ୍ଧାର କରିଥିବା ବେଳେ ବୃଦ୍ଧା ମାଆ ବୁରମ୍ମାଙ୍କ ସନ୍ଧାନ ମିଳିପାରି ନାହିଁ।
ପରିବାର ସୂତ୍ରରୁ ମିଳିଥିବା ସୂଚନା ଅନୁଯାୟୀ, ସୂର୍ଯ୍ୟାବତୀଙ୍କ ଜୀବନ ସଂଘର୍ଷ ଏବଂ ଦୁଃଖଭରା ଥିଲା । କିଛି ବର୍ଷ ପୂର୍ବେ ସୂର୍ଯ୍ୟାବତୀଙ୍କ ସ୍ୱାମୀଙ୍କର ଦେହାନ୍ତ ହୋଇଯାଇଥିଲା, ଯାହା ପରେ ତାଙ୍କ ବୃଦ୍ଧା ମାଆ ତାଙ୍କ ସହ ରହିବାକୁ ଆସିଥିଲେ। ଏହାପରେ ଏକ ସଡ଼କ ଦୁର୍ଘଟଣାରେ ତାଙ୍କ ବଡ଼ ପୁଅର ମଧ୍ୟ ମୃତ୍ୟୁ ହୋଇଥିଲା, ଯାହା ପରିବାରକୁ ସମ୍ପୂର୍ଣ୍ଣ ଭାଙ୍ଗି ଦେଇଥିଲା।
୮୦ ବର୍ଷୀୟା ମାଆ ବୁରମ୍ମା ବାର୍ଦ୍ଧକ୍ୟ ଜନିତ ରୋଗରେ ପୀଡ଼ିତ ଥିଲେ ଏବଂ ତାଙ୍କର ଆଖିକୁ ମଧ୍ୟ ଭଲଭାବେ ଦେଖାଯାଉନଥିଲା। ଅନ୍ୟପଟେ ସୂର୍ଯ୍ୟାବତୀ ନିଜେ ମଧ୍ୟ ଅନେକ ସ୍ୱାସ୍ଥ୍ୟ ସମସ୍ୟା ଦେଇ ଗତି କରୁଥିଲେ। ସୂର୍ଯ୍ୟାବତୀଙ୍କର ଆଉ ଏକ ପୁଅ ଏବଂ ଝିଅ ଅଛନ୍ତି, ଯେଉଁମାନେ ବିବାହିତ। କିନ୍ତୁ ସୂର୍ଯ୍ୟାବତୀ ସବୁବେଳେ ନିଜ ମାଆର ଭବିଷ୍ୟତକୁ ନେଇ ଅତିମାତ୍ରାରେ ଚିନ୍ତିତ ଏବଂ ମାନସିକ ଚାପରେ ରହୁଥିଲେ।
ସେ ପ୍ରାୟତଃ ପରିବାର ସଦସ୍ୟଙ୍କ ଆଗରେ କହୁଥିଲେ, ଯଦି ମୋର ମୃତ୍ୟୁ ହୋଇଯାଏ, ତେବେ ମୋର ଏହି ଅସହାୟ ବୃଦ୍ଧା ମାଆର ଯତ୍ନ କିଏ ନେବ ? ମୁଁ ତାଙ୍କୁ ଅନାଥ ହେବାକୁ ଦେବିନାହିଁ। ମାଆକୁ ଏକା ଛାଡ଼ି ନଯିବା ପାଇଁ ସେ ପୂର୍ବରୁ ମଧ୍ୟ କେତେକ ସମୟରେ ମାଆ ସହ ଜୀବନ ହାରିବା କଥା ପ୍ରକାଶ କରିଥିଲେ। ସେହି ଭୟ ଏବଂ ଅତ୍ୟଧିକ ଚିନ୍ତା ଯୋଗୁଁ ସେ ଶେଷରେ ଏହିଭଳି ଦୁଃଖଦ ନିଷ୍ପତ୍ତି ନେଇଥିବା ଅନୁମାନ କରାଯାଉଛି।
ସ୍ଥାନୀୟ ପୋଲିସ ଏହି ଘଟଣାରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ସୂର୍ଯ୍ୟାବତୀଙ୍କ ମୃତଦେହକୁ ବ୍ୟବଚ୍ଛେଦ (Post-mortem) ପାଇଁ କୋଥାପେଟା ସରକାରୀ ମେଡିକାଲକୁ ପଠାଯାଇଛି। ପୋଲିସ ଅଧିକାରୀଙ୍କ କହିବା ଅନୁଯାୟୀ, ବର୍ତ୍ତମାନ ପରିବାର ଲୋକଙ୍କ ବୟାନକୁ ପ୍ରାଥମିକ ତଦନ୍ତର ଅଂଶ ଭାବେ ଗ୍ରହଣ କରାଯାଇଛି ଏବଂ ସମସ୍ତ ଦିଗକୁ ଅନୁଧ୍ୟାନ କରାଯିବା ପରେ ହିଁ ପ୍ରକୃତ କାରଣ ସ୍ପଷ୍ଟ ହେବ।
