ମଦନ ମିତ୍ରଙ୍କୁ ଅଭିଷେକ ବାନାର୍ଜୀଙ୍କ ଲିଗାଲ ନୋଟିସ, ‘ହତ୍ୟାକାରୀ’ ମନ୍ତବ୍ୟ ପାଇଁ କ୍ଷତିପୂରଣ ଓ ସାର୍ବଜନିକ କ୍ଷମା ଯାଚନା ଦାବି କଲେ

କୋଲକାତା: ତୃଣ ମୂଳ କଂଗ୍ରେସ (ଟିଏମସି)ରେ ଏକ ନୂଆ ବିବାଦ ଉପୁଜିଛି। ସାଂସଦ ଅଭିଷେକ ବାନାର୍ଜୀ ଫେସବୁକ୍ ଲାଇଭ କାଳରେ କଥିତ ମାନହାନୀକାରକ ଟିପ୍ପଣୀ ପାଇଁ ପାର୍ଟି ବିଧାୟକ ମଦନ ମିତ୍ରଙ୍କୁ ଲିଗାଲ ନୋଟିସ୍ ପଠାଇଛନ୍ତି। ଖବର ଅନୁସାରେ ମଙ୍ଗଳବାର ପଠାଯାଇଥିବା ନୋଟିସ୍ ରେ ନିସର୍ତ୍ତ ସାର୍ବଜନିକ କ୍ଷମାଯାଚନା ସହ ୧୦ କୋଟି ଟଙ୍କା କ୍ଷତିପୂରଣ ଦାବି କରାଯାଇଛି। କାମରହାଟି ବିଧାୟକଙ୍କ ବୟାନବାଜୀ ତାଙ୍କ ପ୍ରତିଷ୍ଠାକୁ ଆଞ୍ଚ ଆଣିଥିବା ଅଭିଷେକ ଅଭିଯୋଗ କରିଛନ୍ତି।

ଲିଗାଲ ନୋଟିସ୍ ଅନୁସାରେ ମିତ୍ର ୧୯ ଜୁଲାଇ ରାତି ୯ଟା ୪୦ ମିନିଟ୍ ରେ ତାଙ୍କ ଅଧିକାରୀକ ଫେସବୁକ୍ ପେଜରୁ ଲାଇଭ ପ୍ରସାରଣ କରି କଥିତ ରୂପେ ଅଭିଷେକ ବାନାର୍ଜୀଙ୍କୁ ହତ୍ୟାକାରୀ ବୋଲି କହିବା ସହ ସେ ସୁପାରି କିଲରଙ୍କୁ କାମରେ ରଖିଥିଲେ ବୋଲି ଅଭିଯୋଗ କରିଥିଲେ। ଏଣୁ ଲିଗାଲ ନୋଟିସ୍ ରେ ମହକିଲଙ୍କ ବିରୋଧରେ କୌଣସି ପ୍ରକାରର ମାନହାନୀକାରକ, ମିଥ୍ୟା ଓ ନିରାଧାର ବୟାନଦେବା, ପ୍ରକାଶିତ କରିବା, ପ୍ରସାରଣ କରିବା ଓ ଦୋହରାଇବାରୁ ବର୍ତ୍ତନ୍ତୁ ବୋଲି ନୋଟିସ୍ ରେ କୁହାଯାଇଛି।

ଅଭିଷେକ ବାନାର୍ଜୀ ୭୨ ଘଣ୍ଟା ମଧ୍ୟରେ ମିତ୍ରଙ୍କୁ ଲିଖିତ ଓ ଭିଡିଓ କ୍ଷମାଯାଚନା ଜାରି କରିବାକୁ କହିଛନ୍ତି। ନୋଟିସ୍ ରେ ବାନାର୍ଜୀଙ୍କ ରାଜନୈତିକ ପ୍ରତିଷ୍ଠା ଓ ସାର୍ବଜନିକ ଛବିର ହୋଇଥିବା କ୍ଷତି ପାଇଁ ୧୦ କୋଟି ଟଙ୍କାର କ୍ଷତିପୂରଣ ଦାବି ମଧ୍ୟ କରିଛନ୍ତି। ଏଥିରେ କୁହାଯାଇଛି ଯେ ଯଦି ମିତ୍ର କ୍ଷତିପୂରଣ ପ୍ରଦାନ କରନ୍ତି ତାକୁ ଏକ ପଞ୍ଜିକୃତ ଟ୍ରଷ୍ଟରେ ଜମା କରାଯିବ। ଏହି ଧନ ରାଶିକୁ ଦଳବଦଳ କରିଥିବା ଟିଏମସି ବିଧାୟକ ଓ ସାଂସଦଙ୍କ ବିରୋଧରେ ଦଳବଦଳ କାର୍ଯ୍ୟାନୁଷ୍ଠାନ ଚଳାଇବା ଓ ରାଜନୈତିକ ହିଂସାରେ ପୀଡ଼ିତଙ୍କ ଆଇନଗତ ଓ ଥଇଥାନ ସମ୍ପର୍କିତ ଆବଶ୍ୟକତା ପୂରଣ କରିବାକୁ ବ୍ୟୟ କରାଯିବ।