Water Tank Insulation Cover: ଖରାଦିନେ ପ୍ରବଳ ଉତ୍ତାପ ଯୋଗୁଁ ଘର ଛାତ ଉପରେ ଥିବା ପ୍ଲାଷ୍ଟିକ୍ ପାଣି ଟାଙ୍କିର ପାଣି ଏତେ ଗରମ ହୋଇଯାଏ ଯେ, ମଧ୍ୟାହ୍ନ ପରେ ତାହା ବ୍ୟବହାର କରିବା ଅସମ୍ଭବ ହୋଇପଡ଼େ। ନଳରୁ ଫୁଟନ୍ତା ପାଣି ବାହାରିବା ଭଳି ଅନୁଭବ ହୁଏ। ଏହି ସମସ୍ୟାର ସହଜ ସମାଧାନ ପାଇଁ ବଜାରକୁ ଆସିଛି ‘ଇନସୁଲେଟେଡ୍ ଥର୍ମାଲ ୱାଟର ଟ୍ୟାଙ୍କ କଭର’ ।
ଟାଙ୍କି କଭର କିପରି କାମ କରେ?
ଏହି ସ୍ୱତନ୍ତ୍ର କଭରଗୁଡ଼ିକ ଏକ ‘ଥର୍ମାସ ବୋତଲ’ ଭଳି କାମ କରିଥାଏ। ଏହା ସୂର୍ଯ୍ୟଙ୍କର ପ୍ରଖର କିରଣ ଏବଂ ବାହାରର ଉତ୍ତାପକୁ ଟାଙ୍କି ଭିତରକୁ ପ୍ରବେଶ କରିବାକୁ ଦିଏନାହିଁ। ଭଲ କ୍ୱାଲିଟିର କଭରଗୁଡ଼ିକ ୩-ଲେୟାର୍ ବିଶିଷ୍ଟ ହୋଇଥାଏ। ଏଥିରେ ଆଲୁମିନିୟମ୍ ଫଏଲ୍ ଏବଂ ଫୋମର ବ୍ୟବହାର କରାଯାଇଥାଏ।ଆଲୁମିନିୟମ୍ ଫଏଲ୍ ସୂର୍ଯ୍ୟକିରଣକୁ ପ୍ରତିଫଳିତ କରିଦିଏ ଏବଂ ଫୋମ୍ ଇନସୁଲେସନର କାମ କରେ। ଫଳରେ ବାହାରେ ତାପମାତ୍ରା ୪୫ ଡିଗ୍ରୀ ଥିଲେ ମଧ୍ୟ ଟାଙ୍କି ଭିତର ପାଣି ସ୍ୱାଭାବିକ ଏବଂ ପ୍ରାକୃତିକ ଭାବେ ଥଣ୍ଡା ରହେ।
ଟାଙ୍କି କଭର ବ୍ୟବହାର କରିବାର ଲାଭ
ଦ୍ୱିପ୍ରହରର ଟାଣ ଖରାରେ ମଧ୍ୟ ଆପଣଙ୍କୁ ନଳରୁ ଗରମ ପାଣି ପରିବର୍ତ୍ତେ ସାଧାରଣ ଥଣ୍ଡା ପାଣି ମିଳିଥାଏ। ଅତ୍ୟଧିକ ଖରା ଯୋଗୁଁ ପ୍ଲାଷ୍ଟିକ୍ ଟାଙ୍କି ଶୀଘ୍ର ଖରାପ ବା ଫାଟି ଯିବାର ଆଶଙ୍କା ଥାଏ। ଏହି କଭର ଟାଙ୍କିକୁ ସୁରକ୍ଷିତ ରଖିବାରେ ସହାୟକ ହୁଏ । ଏହାକୁ ଟାଙ୍କି ଉପରେ ଘୋଡ଼ାଇବା ଏବଂ ବାହାର କରିବା ବହୁତ ସହଜ।
ଏହାର ମୂଲ୍ୟ କେତେ?
ବଜାରରେ ୩୦୦ ଲିଟର, ୫୦୦ ଲିଟର ଏବଂ ୧୦୦୦ ଲିଟର ଭଳି ଭିନ୍ନ ଭିନ୍ନ ସାଇଜ୍ର ଟାଙ୍କି ପାଇଁ କଭର ଉପଲବ୍ଧ । କଭରର ଆକାର, ଡିଜାଇନ୍ ଏବଂ ବ୍ରାଣ୍ଡ୍ ଅନୁସାରେ ଏହାର ଦାମ ଅଲଗା ଅଲଗା ହୋଇଥାଏ। ସାଧାରଣତଃ ଏକ ଭଲ ୫୦୦ ଲିଟର ପାଣି ଟାଙ୍କି କଭରର ମୂଲ୍ୟ ଅନଲାଇନ୍ରେ ୯୦୦ ଟଙ୍କାରୁ ଆରମ୍ଭ କରି ୨୨୦୦ ଟଙ୍କା ମଧ୍ୟରେ ରହିଥାଏ। କେତେକ ପ୍ରିମିୟମ୍ କଭରର ଦାମ୍ ୧୫୦୦ ରୁ ୩୦୦୦ ଟଙ୍କା ପର୍ଯ୍ୟନ୍ତ ମଧ୍ୟ ଯାଇପାରେ। ହାରାହାରି ଭାବେ ଦେଖିଲେ, ଆପଣ ୧୦୦୦ ରୁ ୨୦୦୦ ଟଙ୍କା ଭିତରେ ଏକ ଭଲ କ୍ୱାଲିଟିର କଭର ପାଇପାରିବେ। ଆପଣ ଏହାକୁ ଆପଣଙ୍କ ସ୍ଥାନୀୟ ସାନିଟାରୀ କିମ୍ବା ହାର୍ଡୱେର୍ ଦୋକାନରୁ କିଣିପାରିବେ, ଯେଉଁଠାରେ ପାଣି ଟାଙ୍କି ବିକ୍ରି ହୁଏ। ଏହା ବ୍ୟତୀତ ବିଭିନ୍ନ ଇ-କମର୍ସ ଅନଲାଇନ୍ ପ୍ଲାଟଫର୍ମରେ ମଧ୍ୟ ଏହା ସହଜରେ ଉପଲବ୍ଧ।
