ନୂଆଦିଲ୍ଲୀ: ଡେନମାର୍କର ରାଜକୁମାରୀ ଇସାବେଲା ୧୧ ମାସ ପାଇଁ ସାମରିକ ସେବାରେ ଯୋଗଦେଇ ଏକ ଐତିହାସିକ ଅଧ୍ୟାୟ ସୃଷ୍ଟି କରିଛନ୍ତି। ଏହା ସହିତ ସେ ଡେନମାର୍କ ରାଜପରିବାରର ପ୍ରଥମ ମହିଳା ସଦସ୍ୟ ଭାବରେ ସେନାରେ ସମ୍ପୂର୍ଣ୍ଣ ସାମରିକ ତାଲିମ ଗ୍ରହଣ କରିବାକୁ ଯାଉଛନ୍ତି। ୧୯ ବର୍ଷୀୟା ରାଜକୁମାରୀ ସ୍ଲାଗେଲସେ ସ୍ଥିତ ଆଣ୍ଟଭୋର୍ସକୋଭ ବାରାକରେ ନିଜର କର୍ତ୍ତବ୍ୟ ଭାର ଗ୍ରହଣ କରିଛନ୍ତି।
ସେ ଡେନମାର୍କର ରାଜା ଫ୍ରେଡେରିକ୍ X ଏବଂ ରାଣୀ ମେରୀଙ୍କ ଜ୍ୟେଷ୍ଠ କନ୍ୟା। ହାଇସ୍କୁଲ୍ ପାଠପଢ଼ା ଶେଷ କରିବାର କିଛି ସପ୍ତାହ ପରେ ସେ ଗାର୍ଡ ହୁସାର୍ ରେଜିମେଣ୍ଟରେ ଯୋଗଦେଇଛନ୍ତି। ସାଧାରଣତଃ ଡେନମାର୍କରେ ସେନାରେ ଯୋଗଦେଉଥିବା ଯୁବକଯୁବତୀମାନଙ୍କୁ ୧୧ ମାସର ସେବା ପାଇଁ ମାସିକ ଦରମା ଏବଂ କରମୁକ୍ତ ଦୈନିକ ଭତ୍ତା ପ୍ରଦାନ କରାଯାଇଥାଏ। ତେବେ ରାଜକୁମାରୀ ଇସାବେଲା ସରକାରୀ ସାମରିକ ଭତ୍ତା କିମ୍ବା ଦରମା ଗ୍ରହଣ ନକରିବାକୁ ନିଷ୍ପତ୍ତି ନେଇଛନ୍ତି। ସେବା ସମୟରେ ସେ ସମ୍ପୂର୍ଣ୍ଣ ଭାବରେ ନିଜ ପିତାମାତାଙ୍କ ସାହାଯ୍ୟ ଉପରେ ନିର୍ଭର କରିବେ ବୋଲି ଡେନମାର୍କ ରାଜପରିବାର ପକ୍ଷରୁ ସ୍ପଷ୍ଟ କରାଯାଇଛି।
ରାଜପରିବାରର ପରମ୍ପରା
ଡେନମାର୍କ ରାଜପରିବାରର ସଦସ୍ୟମାନେ ପରମ୍ପରାଗତ ଭାବରେ ସେନାରେ ସେବା ପ୍ରଦାନ କରିଆସୁଛନ୍ତି। ଇସାବେଲାଙ୍କ ବଡ଼ ଭାଇ କ୍ରାଉନ୍ ପ୍ରିନ୍ସ କ୍ରିଷ୍ଟିଆନ୍ ମଧ୍ୟ ଏହି ବାରାକରେ ନିଜର ସାମରିକ ସେବା ଶେଷ କରିଛନ୍ତି। ତେବେ ଦେଶର ବିସ୍ତାରିତ ସାମରିକ ନିୟମ ଅଧୀନରେ ପ୍ରତ୍ୟକ୍ଷ ସାମରିକ ସେବାରେ ଯୋଗଦେବାରେ ଇସାବେଲା ହେଉଛନ୍ତି ପ୍ରଥମ ମହିଳା।
ୟୁରୋପରେ ବୃଦ୍ଧି ପାଉଥିବା ସୁରକ୍ଷା ଚିନ୍ତା, ୟୁକ୍ରେନ୍ ଯୁଦ୍ଧ ଏବଂ ଆର୍କଟିକ ଅଞ୍ଚଳରେ ଚାପକୁ ଦୃଷ୍ଟିରେ ରଖି ଡେନମାର୍କ ନିଜର ସେନା ବାହିନୀକୁ ଶକ୍ତିଶାଳୀ କରୁଛି। ୨୦୨୪ ମସିହାରେ ଡେନମାର୍କ ମହିଳାମାନଙ୍କ ପାଇଁ ବାଧ୍ୟତାମୂଳକ ସାମରିକ ସେବା ନିୟମ ଲାଗୁ କରିଥିଲା ଏବଂ ସେବା ଅବଧିକୁ ୪ ମାସରୁ ବୃଦ୍ଧି କରି ୧୧ ମାସ କରିଥିଲା। ଚଳିତ ସପ୍ତାହରେ ପ୍ରାୟ ୧,୬୦୦ ଯୁବକଯୁବତୀ ଏହି ବିସ୍ତାରିତ ସାମରିକ ତାଲିମରେ ଯୋଗଦେଇଛନ୍ତି। ଏହି ମାସ ଶେଷ ଆଡ଼କୁ କେତେକଙ୍କୁ ଅପରେସନାଲ କାର୍ଯ୍ୟ ପାଇଁ ଗ୍ରୀନଲ୍ୟାଣ୍ଡ ମଧ୍ୟ ପଠାଯିବ।
