Facebook ଲାଇଭରେ ମମତା କହିଲେ ତାଙ୍କ ଭବିଷ୍ୟତର ରଣନୀତି, ଜାଣନ୍ତୁ ରାଜନୀତିରୁ ‘ସନ୍ୟାସ’ କୁ ନେଇ କହିଲେ କ’ଣ?

କୋଲକାତା: ପଶ୍ଚିମବଙ୍ଗ ରାଜନୀତିରେ ଜାରି ଭିଡାଓଟରା ମଧ୍ୟରେ ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ବୟାନ ସାମ୍ନାକୁ ଆସିଛି। ସୋମବାର ତୃଣ ମୂଳ କଂଗ୍ରେସ(ଟିଏମସି) ମୁଖିଆ ଫେସବୁକ୍ ଲାଇଭ ମାଧ୍ୟମରେ ସ୍ପଷ୍ଟ କରିଦେଇଛନ୍ତି ଯେ ସେ ରାଜନୀତିରୁ ‘ସନ୍ୟାସ’ ନେଉ ନାହାନ୍ତି। କେବଳ ଏତିକି ନୁହେଁ ସେ ବର୍ତ୍ତମାନ ବେଙ୍ଗଲର ବିଜେପି ସରକାରକୁ ନେଇ ନିଜର ଆଭିମୁଖ୍ୟ ସ୍ପଷ୍ଟ କରିଛନ୍ତି। ମମତା କହିଛନ୍ତି ଯେ ବିଜେପିକୁ ସେ ଯେଉଁ ପର୍ଯ୍ୟନ୍ତ ରାଜନୈତିକ ନେପଥ୍ୟ (ଅନ୍ଧକାର)କୁ ଠେଲି ନ ଦେଇଛନ୍ତି ସେ ପର୍ଯ୍ୟନ୍ତ ସେ ଚୁପ୍ ବସିବେ ନାହିଁ।

ଲାଇଭ ଭିଡିଓରେ ମମତା ବାନାର୍ଜୀ ଦାବି କରିଛନ୍ତି ଯେ ରାଜ୍ୟରେ ସରକାର ପରିବର୍ତ୍ତନର ମାତ୍ର ୪ ମାସରେ ଜନତାଙ୍କୁ ବିଜେପିର ଅସଲ ଚେହେରା ଦେଖାଗଲାଣି। ଭିଡିଓରେ ମହିଳାଙ୍କ ଲାଗି ଚଳା ଯାଉଥିବା ‘ଅନ୍ନପୂର୍ଣ୍ଣା ଭଣ୍ଡାର’ ଆର୍ଥିକ ସହାୟତା ଯୋଜନା ପଇସା ଆବଣ୍ଟନରେ କଥିତ ବିଳମ୍ବକୁ ନେଇ ଶୁଭେନ୍ଦୁ ଅଧିକାରୀଙ୍କ ସରକାରଙ୍କୁ ଘେରିଛନ୍ତି। ମମତା ଅଭିଯୋଗ କରିଛନ୍ତି ଯେ ରାଜ୍ୟ ସରକାର ଯୋଜନାର ପାତ୍ରତା ମାନଦଣ୍ଡ ବାହାନାରେ ହିତାଧିକାରୀଙ୍କ ସଂଖ୍ୟା ହ୍ରାସ କରୁଛନ୍ତି। ମମତା କହିଛନ୍ତି ଯେ ମହିଳାଙ୍କୁ ଆର୍ଥିକ ରୂପେ ଆତ୍ମନିର୍ଭର କରିବା ପାଇଁ ତାଙ୍କ ପାର୍ଟି ‘ଲକ୍ଷ୍ମୀ ଭଣ୍ଡାର’ ଯୋଜନା ଆରମ୍ଭ କରିଥିଲା। ହେଲେ ବିଜେପି ଏହି ଯୋଜନାରେ ଧର୍ମ ଓ ଜାତି ଦେଖି ରାଜନୀତି କରୁଛି ଓ ମହିଳାଙ୍କୁ ଦେଇଥିବା ପ୍ରତିଶ୍ରୁତି ପୂରଣ କରୁନି।

ଫେସବୁକ୍ ଲାଇଭରେ ମମତା ବାନାର୍ଜୀ ଚେତାବନୀ ଦେଇଛନ୍ତି ଯେ ରାଜ୍ୟରେ ଜନଗଣନା ପ୍ରକ୍ରିୟା ଅସଲରେ ନ୍ୟାସନାଲ ରିଜିଷ୍ଟ୍ରାର ଅଫ ସିଟିଜେନ( ଏନଆରସି)କୁ ପଛ ଦ୍ୱାର ଦେଇ ଲାଗୁ କରିବାର ଏକ ପ୍ରୟାସ, ଏ ନେଇ ରାଜନୈତିକ ଦଳଙ୍କ ସହିତ କୌଣସି ପରାମର୍ଶ କରାନଯାଇ ଜନତାଙ୍କ ଉପରେ ଥୋପା ଯାଉଛି। ଏଣୁ ମମତା ଲୋକଙ୍କୁ ସତର୍କ କରିଛନ୍ତି ଯେ ଜନଗଣନା ଫର୍ମରେ ସ୍ୱାକ୍ଷର କରିବା ଓ ନିଜ ବ୍ୟକ୍ତିଗତ ସୂଚନା ଦେବା ବେଳେ ପୁରା ସାବଧାନତା ଅବଲମ୍ବନ କରନ୍ତୁ। କାରଣ ଏହା ଦ୍ୱାରା ଲୋକଙ୍କ ନିଜ ସଞ୍ଚୟ ମଧ୍ୟ ପ୍ରଭାବିତ ହୋଇପାରେ।

କେବଳ ଏତିକି ନୁହେଁ ସ୍ପେଶାଲ ଇଣ୍ଟେନସିଭ ରିଭିଜନ (ଏସଆଇଆର)ରେ ଭୋଟର ଲିଷ୍ଟରୁ ଲକ୍ଷଲକ୍ଷ ବୈଧ ଭୋଟରଙ୍କୁ ଅବୈଧ ରୂପେ ହଟା ଯାଇଛି। ଏଣୁ ଏଥି ପାଇଁ ଯଦି ଆବଶ୍ୟକ ପଡେ ସେ ଏହା ବିରୋଧରେ ପୁଣି ଥରେ ସୁପ୍ରିମକୋର୍ଟ ଯାଇ ପାରନ୍ତି। ଏହା ଛଡା ଲାଇଭ ଶେଷ ବେଳକୁ ମମତା ଯାଦବପୁର ବିଶ୍ୱବିଦ୍ୟାଳୟ ବିବାଦର ଉଲ୍ଲେଖ କରିଛନ୍ତି। ସେ ଏବିଭିପି ଓ ବାମପନ୍ଥୀ ଛାତ୍ରଙ୍କ ମଧ୍ୟରେ ହୋଇଥିବା ଝଗଡାର ଉଲ୍ଲେଖ କରି କହିଛନ୍ତି ଯେ କ୍ୟାମ୍ପସ ଭାଙ୍ଗାରୁଜା ଘଟଣାକୁ ସୁନିୟୋଜିତ ଢଙ୍ଗରେ ସଫଳ କରାଯାଇଛି। ମମତା କହିଛନ୍ତି ଯେ ଯଦିଓ କିଛି ଛାତ୍ରଙ୍କ ବିଚାର ସହ ମତପାର୍ଥକ୍ୟ ରହିଛି ସେମାନେ ମୋତେ ସମ୍ମାନ କରନ୍ତି।